Tuesday 13 December 2011

వెతుకుతున్నాను ..



వేల అడుగుల నీడల నడుమ,
వేల ఊపిరుల జాడల మధ్య ,
వెన్నంటి వచ్చే నీ వ్యక్తిత్వాన్ని
ఒంటరిగా వెతుకుతున్నాను ..

ఆశల  శిఖరపు అంచుల చివర
నిరాశల అగాధపు లోతుల లోపల 
విస్తరించిన నీ విశ్వరూపాన్ని
గుర్తుపట్టలేక వెతుకుతున్నను  ..

నా ఊపిరి అలలను మోసే కడలివై 
నా ఊహల మెరుపులను భరించే మిన్నువై
నా ఇంట్లోనే ఉన్న నిన్ను
ఊరంతా వెతుకుతున్నాను ... 

విరహం తొలగి
నిరీక్షణ కరిగి
నిన్ను చూసే ఒక్క క్షణం కోసం
లక్షల యేళ్ళుగా  వెతుకుతున్నాను   

Wednesday 7 December 2011

నా మొదటి శతకం - కొన్ని పద్యాలు

తెలిసె నేఁడు నాకు తెలుగులో మాధుర్య
మందమైన భావమంకురింప
తెలుగు తరచి చూడఁ దేనె ధారలు జారు
చక్రి పలుకు వినుఁడు సత్య వాక్కు

అంబరంబునంటు హర్మ్యాళి  నిర్మించె
విశ్వమంత నిలిచి విస్తుబోవ
మనిషి మింటికేగె మరిచి తన భువిని
చక్రి పలుకు వినుఁడు సత్య వాక్కు

వింతగొలుపుఁ జూడ విత్తు మొలచు తీరు
నెదుగు నేల గుణముకెదురు నిలిచి
స్థితులు గతులు వెతలు స్థిరచిత్తునాపునే ?
 చక్రి పలుకు వినుఁడు సత్య వాక్కు

తాతలిడిన  యాస్తి తమగొప్పగన్ జూపి
విర్రవీగు చుంద్రు వింత గాను
తెలిసికొనఁగవారు తెలివైన సోమరుల్
చక్రి పలుకు వినుఁడు సత్య వాక్కు

కులము పేర ఖలులు కూడఁగట్టు బలిమి
మానవత్మమెదుట మనఁగఁబోదు
తిమిరచయము తొలఁగు దినకరద్యుతి సోక
చక్రి పలుకు వినుఁడు సత్య వాక్కు