Wednesday 22 February 2012

సింగరాజు -- మాతృభాషా దినోత్సవం ఏర్పాట్లు

అంతర్జాతీయ మాతృభాషా దినోత్సవానికి , ఒక పెద్ద సభ ఏర్పాటు చేసి , ఊళ్ళో తన పలుకుబడి పెంచుకుందామనుకున్న సింగరాజు దాని ఏర్పాట్లలో ' బిజీ' గా ఉన్నాడు . మధ్యలో మన లింగరాజు ఏదో పని తగిలి 'కాల్ ' చేసాడు .


సింగ :- ' హలో '
లింగ :- ' హలో ....' 


సింగ :- ' హలో .. హలో  ... సరిగ్గా వినపడట్లేదు , 'సిగ్నల్ వీక్ 'గా ఉన్నట్టు ఉంది , కొంచెం గట్టిగా మాట్లాడండి '


లింగ :- ఒరేయ్ , నేను లింగాన్ని , వినపడుతోందా ఇప్పుడు ? 


సింగ :- లింగా ! నువ్వా ! 'ఫైన్ 'గా వినపడుతోందిప్పుడు .. ఏంటి 'మాటర్ ' ఇప్పుడు ' కాల్ ' చేసావు  ?


లింగ :- ఏరా పన్లో ఉన్నావా ? పర్లేదా మాట్లాడొచ్చా ?
సింగ :- కొంచెం 'బిజీ ' గా ఉన్నాన్రా , 'ఫంక్షన్ ' ఏర్పాట్లలో ఉన్నాను .
లింగ :- ఏం ' ఫంక్షన్ ' రా ? ఇంట్లో ఏమన్నా విశేషమా ?
సింగ :- ఇంట్లో కాదెహై ! ఈ రోజు ' ఇంటర్నేషనల్   మదర్ లాంగ్వేజ్  డే'  , ' సో '  మన  ఊళ్ళో పెద్ద 'ఫంక్షన్ ' ఏర్పాటు చేస్తున్నాను .
లింగ:- అవునా ! మాతృభాషా దినోత్సవమా ?
సింగ :- ఏ నీకు తెలీదా ? ఎలాగా తెలుగుని 'యూజ్' చెయ్యరు , కనీసం ఇలాంటి 'డేస్ ' అయినా  ' మైండ్'లో పెట్టుకోండిరా. ఎప్పుడు 'చేంజ్' అవుతారురా మీలాంటి వారు . 'వరల్డ్'లో జనాలు  మొత్తం వారి వారి 'లోకల్ లాంగ్వేజెస్ ' ని కాపాడుకోవలనే 'థాట్' తో  ' పెట్టింది ఈ 'డే' ని . ఇలాగైనా జనాలు తమ ' నేటివిటీ ' ని గుర్తుపెట్టుకుంటారు అని  'హోప్ ' . ఇప్పుడు మీ లాంటి 'సిల్లీ ఫెల్లోస్ ' వల్ల ఆ ' హోప్' కూడా 'లెస్ ' అయిపోతోంది .


లింగ :- ఆపరా బాబు , సమయం చిక్కితే చాలు నామీద విరుచుకుపడతావు . ఇంతకీ ఈ శుభసందర్భంలో నువ్వు ఏం చేస్తున్నావో అది చెప్పు . ఏదో ఏర్పాట్లు అంటున్నావ్ ,ఎమిటో అవి ?


సింగ :- అబ్బో , ఎన్నో చేస్తున్నాం , చాల పెద్ద 'ప్లాన్ '. ఉదయం మన 'గవర్నమెంట్ స్కూల్ ' పిల్లలకి 'తెలుగు భాష యొక్క ఆవశ్యకత ' అనే 'టాపిక్' మీద ' ఒన్ అవర్ ' చిన్న 'ప్రెజెంటేషన్ ' ' అరేంజ్ ' చేసాం .  వాళ్ళందరి చేతా తెలుగులోనే మాట్లాడతాం  అని ఒట్టు పెట్టిస్తాం .


లింగ :- ఆలోచన బాగుంది , కాని ప్రభుత్వ పాఠశాల ఎందుకు  దీనికి . వారిది ఎలాగ తెలుగు మాధ్యమమేగా . ఆ చేయించేదేదో  ఏ ఆంగ్ల మాధ్యమ పాఠశాలవారితోనో చేయించొచ్చుగా


సింగ :- ఆ 'ఇంగ్లిష్ మీడియుం స్కూల్ ' వాళ్ళకి ఏవో 'ఎక్స్ట్రా క్లాస్ ' లున్నాయంట , పైగా వారిది  'IIT కోచింగ్ 'సమయం అట ఇది , దానికి తోడు , ఎన్నో ' టాలెంట్ టెస్ట్ 'లకి  వాళ్ళ పిల్లలు ' ప్రిపేర్ ' అవుతున్నారంట . 
         'సో ' ఈ 'టైం'లో పిల్లలని ' డిస్టర్బ్ ' చేస్తే , వాళ్ళ 'మార్క్స్ ' తగ్గితే , ' పేరెంట్స్  ' గొడవ చేస్తారని , 'స్కూల్ రెపుటేషన్ ' పోతుందని , 'నొ ' అన్నారు  వాళ్ళు


లింగ :- కాబట్టి ప్రభుత్వ పాఠశాల వాళ్ళతో ఇలాంటి పేచీ ఉండదని , వారు నిత్యం తెలుగులో మాట్లాడుతూనే ఉన్నా , మళ్ళీ వాళ్ళకే తెలుగు ఆవశ్యకత గురించి చెప్తారన్నమాట .


సింగ :- మరీ అంత ' లో ' చేసి మాట్లాడకు , ఈ ' ప్రోగ్రాం ' కి మన ఊరి యెం.యెల్.యె గారు వస్తున్నారు తెలుసా  . ఆయనతో మన తెలుగు సంస్కృతి 'గ్రెట్నెస్ '  గురించి నాలుగు ముక్కలు మాట్లాడిద్దామని ' ప్లాన్ ' 


లింగ :- ఎవరూ ? నోరు  విప్పితే బూతులు తప్ప ఇంకోటి రాని ఆ యెం.యెల్.యె గారేనా ? మొన్న శాసనసభలో ఎవో బూతు చిత్రాలు చూస్తూ పట్టుపడిన ఒక శాసనసభ్యుడి చేతిలో ఉన్నది మన యెం.యెల్.యే గారి మొబైలే నట . నీకా విషయం తెలుసా ? ఆయన తెలుగు సంస్కృతి గురించి మాట్లడతాడా !


సింగ :- చూసింది ఆయన కాదు కద ! అయినా నీకు ఈ రోజు ' లాంగ్వేజి డే ' అనే తెలీదు . నీకు 'కామెంట్' చెసే హక్కు లేదు రా .


లింగ :- అవునా ! నిజమే నాకు తెలియదురా , నీకు కొంచెం ఇటువంటి విషయాలలో అవగాహన ఉన్నట్టు ఉందే ?


సింగ :- 'యా!'


లింగ :- అలగైతే నాకు కొన్ని విషయాలు చెప్పి పుణ్యం కట్టుకోరా , నేను కూడా నీలాగా లోక ఙ్ఞానం  పెంచుకుంటాను .
సింగ :- 'ఓ ష్యూర్ , వై నాట్ '


లింగ :- ఇంకా ఈ జనాభాలెక్కలు పూర్తికాలేదు కాబట్టి , ఇతః పూర్వం అనగా 2000-2001 లో జనాభా లెక్కల ప్రకారం , భారత దేశ ప్రాంతీయభాషలలో అత్యధికులు మాట్లడే భాష ఏది ? ప్రాంతీయ భాషలురో , హిందీ అనుకునేవు , అది జాతీయ భాష !


సింగ :- ' ఐ గెస్ , ఇట్స్ తమిళ్ '  , వాళ్ళ భాషాభిమానం , తమిళుల కట్టుబాట్లు చూస్తే ఈ విషయం అర్ధమవుతుంది .


లింగ :- ఏమో మరి , ప్రపంచంలోనే ఎక్కువగా ఉపయోగించే మొదటి 15  భాషల్లో మన దేశ ప్రాంతీయ భాషలు ఉన్నాయా ? ముఖ్యంగా మన తెలుగు  ఉంది అంటావా ?


సింగ :- తెలుగే ఉండి ఉంటే ఇంత నెత్తీ నోరూ కొట్టుకుని మేము సభలు పెట్టి ఉండం . ఖచ్చితంగా ఉండి ఉండదు .


లింగ :- ఇంక ఒక్క చివరి ప్రశ్న . రవీంద్రనాథ్ టాగూరు తర్వాత , సాహిత్యంలో నోబెల్ బహుమతి పరిశీలనకు మన దేశ రచయితలు  రాసినది ఏమన్నా వెళ్ళిందా ?


సింగ :- అప్రస్తుతం ఇది . ఇప్పుడు ఈ 'క్వశ్చన్ ' ఎందుకు ?


లింగ :- అప్రస్తుతం కానే కాదు , 'భాషా దినోత్సవం ' గురించి తెలిసిన నీకు , భారత దేశంలో అత్యధికులు మాట్లడే ప్రాంతీయ భాష 'తెలుగు ' అని  తెలియకపోవడం , పైగా అది మన పక్క రాష్ట్రం వారి భాష ఏమో అని వారి భాషాభిమానాన్ని మెచ్చుకోవటం , మరియు , తెలుగు ఎక్కువగా మాట్లడే ప్రపంచ భాషల్లో 13 వ స్థానం లో ఉంది అని తెలియదు . 'నా దేశం నా ప్రజలు ' అనే ఒక గ్రంధం నోబెల్ పరిశీలనకు వెళ్ళిందని , అది వ్రాసింది ఒక తెలుగువాడు అని కూడా తెలియదు . ఇంకేమనాలిరా .


కట్ ...... మరుక్షణం  ఆ కాల్ కట్ అయిపొయింది ...కొంత సేపు మౌనం , తర్వాత  , ఒక మెసేజి వచ్చింది .. దాని సారాంశం ...


' సారీ రా లింగా ! 'కాల్ కట్  'అయ్యింది ! 'ఫంక్షన్ 'తర్వాత నీకు చేస్తాను , 'టిల్ దెన్ టేక్ కేర్ '  



Wednesday 8 February 2012

కృష్ణ నామ కీర్తనము -- కొన్ని పద్యాలు

తొలగును భవ భీతి తొలగు నఙ్ఞానంబు
తొలగు నఘము, భయము తొలగు చింత
చిత్త శుధ్ధి పెరుగు సేయగ నిత్యంబు
కృష్ణ దివ్య నామ కీర్తనంబు 


మూగ వాని గొంతు మ్రోగును వినినంత,
కుంటి వాడు దాటు కొండ నైన
మహిని దీని మించు మహిమాన్వితంబేది ?
కృష్ణ దివ్య నామ కీర్తనంబు  

రేయి పవలు నేడ్చు రేపల్లె లోబిడ్డ
నూరడించ వాని నొడిన దాల్చి
అమ్మ జేసె ,తనయుడానందమున్ నవ్వ ,
కృష్ణ దివ్య నామ కీర్తనంబు 

Friday 3 February 2012

లింగరాజు - ఉపకారం

(కష్టేఫలి బ్లాగ్ లో 'శర్మ కాలక్షేపంకబుర్లు-ఉపకారం' శీర్షికన రాసిన వ్యాసం చదివి దాని స్పూర్తి తో రాసినది ఇది , శర్మ గారికి కృతఙ్ఞతలు ) 



'ఉపకారికి ఉపకారం విపరీతము గాదు సేయ ......' అంటూ దూరంగా తెలుగుమాస్టారి ఇంట్లో ట్యూషను పిల్లలు వల్లెవేయటం వినపడుతోంది .

లింగ :- ' ఉపకారమా ,వంకాయా . పొరుగువాడికి ఉపకారం , అది చేసేవాడికి మాత్రం ప్రత్యక్ష నరకం ' 


సింగ  :- ఎమిట్రా లింగా ! ఉపకారం పేరు ఎత్తితే కారాలు మిరియాలు నూరుతున్నావు ? కనీసం ఆ తెలుగు మాష్టారి  ట్యూషను పిల్లలకున్న ఙ్ఞానం కూడా నీకు లేనట్టుందే ...


లింగ :- నీకేం తెలుసు బాబు ఉపకారుల కష్టాలు , నీతులు చెప్పడం తెలుగు సినెమాలో హీరోలు కూడా చేస్తారు .. అవి పాటించటమే , రాజమండ్రి బ్రిడ్జి గతుకుల మీద బండి నడిపినంత కష్టం.


సింగ :- ఇప్పుడేమొచ్చిందిరా నీకు అంత కష్టం ! మన యెం. యెల్. యే గాడి స్పీచ్ లాగా పొంతన లేకుండా మాట్లడుతున్నావ్  ...


లింగ :- పొంతన లేకా !  అంతేలే ఆ సూరిగాడు ,వాడి బండిని నీ ఇంట్లో పెట్టి ఉంటే నువ్వూ ఇలాగే మాట్లాడుండేవాడివి ...
సింగ :- ఇదిగో మళ్ళీనూ ! సూరిగాడేంటి వాడి బండేంటి , సరిగ్గా చెప్పు
లింగ :- ఆ సూరిగాడు , ఎదో అవసరమైన పని తగిలి పట్నం వెళ్ళాలి అని , వాళ్ళ ఇంటి గేటు సరిగ్గాలేదని చెప్పి , వాడి కొత్త TVS మా ఇంట్లో పెట్టి వెళ్ళాడు . నాలుగు రోజుల తర్వాత వచ్చి చూసుకుని అందులో పోయించిన  నాలుగు లీటర్ల పెట్రోల్ లేదని , నా వంకే అనుమానంగా చుసి ఏదో గొణుక్కుంటూ  వెళ్ళిపొయాడు . అలా వెళ్ళినవాడు ఊరుకోక మా వీధి అంతా నేను పెట్రోల్ దొంగనని అందరి చెవులూ కొరికేసాడు . పోన్లే  కదా అని సాయం చేస్తే చివరికి నన్ను 'దొంగ ' ని చేసి పోయాడు  . ఇంకేం ఉపకారం , ఇంకేం పుణ్యం . అందుకేరా ఉపకారం లాంటి పదాలు వినటానికే బాగుంటాయి .


సింగ :- ఏమిటీ , ఈ మాత్రానికే ? అయినా ఆ సూరిగాడు గురించి తెలుసుగా , మన ఊళ్ళో వాడంత పిసినారి లేడుగా , పోయి పోయి వాడితో పెట్టుకున్నావ్

లింగ :- నేను పెట్టుకోలేదు బాబు , వాడే ఎదురొచ్చి  నన్ను వెర్రివాడిని చేసాడు .
సింగ :- నువ్వు భలే వాడివి  , ఇది చాలా చిన్నది . మొన్నటికి మొన్న ఆ లక్ష్మీ టాకీసు వీధి చివర కొత్తగా ఇల్లు కట్టుకున్న   ఆ బ్యాంక్ గుమాస్తా తో పోల్చుకుంటే నీకు జరిగింది ఒక లెక్కా .
లింగ :- అబ్బో నాలాంటి వెర్రి  బాగులోళ్ళు ఇంకా ఉన్నారా ? చెప్పు చెప్పు .. కరంటు మన ఇంట్లో పొయినప్పుడు , పక్కింట్లో కూడా పొయిందా లేదా చూసుకుని , అక్కడ కూడా పోతే మనం ఊపిరి పీల్చుకున్నట్టు ఉంది నా పరిస్థితి .
సింగ :- ఆ బ్యాంక్ ఆయన కొత్తగా ఇల్లు కట్టుకున్నాడుగా  , కట్టుకుని సుమారు ఒక మూడేళ్ళు అయ్యిందా ?
లింగ :- ఆ ఒక మూడు , నాలుగేళ్ళు అయ్యుండొచ్చు .
సింగ :- వాళ్ళ ఇంటిపక్కనే ఈ మధ్య ఇంకో బిల్డింగ్ వేసారు గా , ఆ బిల్డింగ్ వెయ్యటానికి గాను , సామాను ఈ బ్యాంక్ ఆయన ఇంట్లో పెట్టుకుంటాం అని అడిగారు . 'పోన్లే పాపం' అని  ఒప్పుకున్నాడాయన . ఇంక అంతే . ఇనుము , చెక్క , మార్బుల్ రాళ్ళు అన్ని ఆయన ఇంటి సందులో పెట్టించారు .
       కొన్ని సార్లు ఆయన ఉద్యోగానికి వెళ్ళిన సమయం లో ఆ చెక్క పనులు , మిగతా చిన్న చితకా పనులూ కూడా వాళ్ళ సందులో చేయించేసారు  . దానికి కూడా 'పోన్లే పాపం ' అని ఊరుకున్నాడాయన .
      చివరికి  ఆ సందు నానా భీభత్సం గా తయారయ్యి , వాళ్ళు వదిలేసిన ఇనుము , చెక్క ముక్కలు అప్పుడప్పుడూ కాళ్ళలోకి దిగుతున్నాయని , మొన్ననే ఆ సందూంతా సిమెంటు చేయించి , ఆ సందు గోడ మట్టికొట్టుకుపొయిందని  మళ్ళీ వెల్ల వేయించాడు .మొత్తం ఒక అరలక్ష ఖర్చు .



లింగ :- మరి ఆ పక్కింటివాళ్ళు ఏమీ చెయ్యలేదా ?
సింగ :- చేసారు , గృహప్రవేశానికి అరిటాకులు కావాలని వీళ్లనే అడిగి పట్టుకెళ్లారు .
లింగ :- ఎవో కొన్ని ఆకులు పట్టుకెళితే , దానికే ?
సింగ :- ఆకులు మంచివి కావాలని మొత్తం చెట్టునే పీకిపడేసారు .
లింగ :- ఒహో అలా అంటావా ! అయితే తప్పు .
సింగ :- కాని ఇలా ఎవరో ఉపయోగించుకున్నారని , అసలు ఉపకారమే చెయ్యననటం తప్పేమో రా , మనిషిగా పుట్టిన వాడు సాటి మనిషికి సాయం చెయ్యాలి  . ప్రతీ రోజూ ఒకలా ఉండదు , ప్రతీ మనిషీ ఒకలా ఉండడు. పారే నదికి నీరు అందివ్వటమే లక్షణం. వికసించే ప్రతి పువ్వుకీ నవ్వులు పంచటమే లక్షణం . మనిషి అని అనుకోవల్సిన ప్రతి వాడికీ ఉపకారం చెయ్యటమే లక్షణం .
లింగ :- అవునా , ఐతే నాకో ఉపకారం చెయ్యి .
సింగ :- చెప్పరా ఏం కావలో .
లింగ :- కొంచెం టైట్ గా ఉంది , ఒక వెయ్యి ఉంటే సర్దు .
సింగ :- వెయ్యా .... (ఎదురుగా పోతున్న ఎవడో మనిషిని పలకరించి ) హలో సుబ్బారావుగారు  , ఏంటి నన్ను రమ్మంటారా ..  ( అని లింగరాజుకేసి తిరిగి) ఒక్కనిముషం రా లింగా ... అని చెప్పి వడివడిగా జారుకున్నడు సింగరాజు   




Wednesday 1 February 2012

స్నేహం

నిర్జీవపు నిశీధి నిండిన హృదయంలో
మరణించిన మనశ్శాంతికి సంజీవని స్నేహం

వెంటనడిచే నీడ కూడా వెక్కిరించే వేళల్లో
కంటతడిని కాచేటి ఓదార్పు స్నేహం

కన్నూ మిన్నూ కానని అహంకారంలో
నిన్ను నీకు తెలియజేసే గుణపాఠం , స్నేహం

పసితనపు ఆటలనుండీ
పండుముదుసలి బోసినవ్వులవరకూ
పంచుకునే చెరిసగమే స్నేహం

ప్రేగు బంధం కాదిది ,
ప్రేమ ఆకర్షణ కానిది

తన నిరుపేద సఖుని పిడికెడు ప్రేమకి
నిలువెల్ల కరిగిన జగన్నాధుని హృదయమిది .



                                                                      --కాపీరైటు @2012 కళ్యాణ్