ఆలోచిస్తే...

కృష్ణ నామ కీర్తనము -- కొన్ని పద్యాలు

2012-02-08T01:49:00.001-08:00

తొలగును భవ భీతి తొలగు నఙ్ఞానంబు
తొలగు నఘము, భయము తొలగు చింత
చిత్త శుధ్ధి పెరుగు సేయగ నిత్యంబు
కృష్ణ దివ్య నామ కీర్తనంబు

మూగ వాని గొంతు మ్రోగును వినినంత,
కుంటి వాడు దాటు కొండ నైన
మహిని దీని మించు మహిమాన్వితంబేది ?
కృష్ణ దివ్య నామ కీర్తనంబు

రేయి పవలు నేడ్చు రేపల్లె లోబిడ్డ
నూరడించ వాని నొడిన దాల్చి
అమ్మ జేసె ,తనయుడానందమున్ నవ్వ ,
కృష్ణ దివ్య నామ కీర్తనంబు

లింగరాజు - ఉపకారం

2012-02-03T04:09:00.000-08:00

(కష్టేఫలి బ్లాగ్ లో 'శర్మ కాలక్షేపంకబుర్లు-ఉపకారం' శీర్షికన రాసిన వ్యాసం చదివి దాని స్పూర్తి తో రాసినది ఇది , శర్మ గారికి కృతఙ్ఞతలు )

'ఉపకారికి ఉపకారం విపరీతము గాదు సేయ ......' అంటూ దూరంగా తెలుగుమాస్టారి ఇంట్లో ట్యూషను పిల్లలు వల్లెవేయటం వినపడుతోంది .

లింగ :- ' ఉపకారమా ,వంకాయా . పొరుగువాడికి ఉపకారం , అది చేసేవాడికి మాత్రం ప్రత్యక్ష నరకం '

సింగ :- ఎమిట్రా లింగా ! ఉపకారం పేరు ఎత్తితే కారాలు మిరియాలు నూరుతున్నావు ? కనీసం ఆ తెలుగు మాష్టారి ట్యూషను పిల్లలకున్న ఙ్ఞానం కూడా నీకు లేనట్టుందే ...

లింగ :- నీకేం తెలుసు బాబు ఉపకారుల కష్టాలు , నీతులు చెప్పడం తెలుగు సినెమాలో హీరోలు కూడా చేస్తారు .. అవి పాటించటమే , రాజమండ్రి బ్రిడ్జి గతుకుల మీద బండి నడిపినంత కష్టం.

సింగ :- ఇప్పుడేమొచ్చిందిరా నీకు అంత కష్టం ! మన యెం. యెల్. యే గాడి స్పీచ్ లాగా పొంతన లేకుండా మాట్లడుతున్నావ్ ...

లింగ :- పొంతన లేకా ! అంతేలే ఆ సూరిగాడు ,వాడి బండిని నీ ఇంట్లో పెట్టి ఉంటే నువ్వూ ఇలాగే మాట్లాడుండేవాడివి ...
సింగ :- ఇదిగో మళ్ళీనూ ! సూరిగాడేంటి వాడి బండేంటి , సరిగ్గా చెప్పు
లింగ :- ఆ సూరిగాడు , ఎదో అవసరమైన పని తగిలి పట్నం వెళ్ళాలి అని , వాళ్ళ ఇంటి గేటు సరిగ్గాలేదని చెప్పి , వాడి కొత్త TVS మా ఇంట్లో పెట్టి వెళ్ళాడు . నాలుగు రోజుల తర్వాత వచ్చి చూసుకుని అందులో పోయించిన నాలుగు లీటర్ల పెట్రోల్ లేదని , నా వంకే అనుమానంగా చుసి ఏదో గొణుక్కుంటూ వెళ్ళిపొయాడు . అలా వెళ్ళినవాడు ఊరుకోక మా వీధి అంతా నేను పెట్రోల్ దొంగనని అందరి చెవులూ కొరికేసాడు . పోన్లే కదా అని సాయం చేస్తే చివరికి నన్ను 'దొంగ ' ని చేసి పోయాడు . ఇంకేం ఉపకారం , ఇంకేం పుణ్యం . అందుకేరా ఉపకారం లాంటి పదాలు వినటానికే బాగుంటాయి .

సింగ :- ఏమిటీ , ఈ మాత్రానికే ? అయినా ఆ సూరిగాడు గురించి తెలుసుగా , మన ఊళ్ళో వాడంత పిసినారి లేడుగా , పోయి పోయి వాడితో పెట్టుకున్నావ్

లింగ :- నేను పెట్టుకోలేదు బాబు , వాడే ఎదురొచ్చి నన్ను వెర్రివాడిని చేసాడు .
సింగ :- నువ్వు భలే వాడివి , ఇది చాలా చిన్నది . మొన్నటికి మొన్న ఆ లక్ష్మీ టాకీసు వీధి చివర కొత్తగా ఇల్లు కట్టుకున్న   ఆ బ్యాంక్ గుమాస్తా తో పోల్చుకుంటే నీకు జరిగింది ఒక లెక్కా .
లింగ :- అబ్బో నాలాంటి వెర్రి బాగులోళ్ళు ఇంకా ఉన్నారా ? చెప్పు చెప్పు .. కరంటు మన ఇంట్లో పొయినప్పుడు , పక్కింట్లో కూడా పొయిందా లేదా చూసుకుని , అక్కడ కూడా పోతే మనం ఊపిరి పీల్చుకున్నట్టు ఉంది నా పరిస్థితి .
సింగ :- ఆ బ్యాంక్ ఆయన కొత్తగా ఇల్లు కట్టుకున్నాడుగా , కట్టుకుని సుమారు ఒక మూడేళ్ళు అయ్యిందా ?
లింగ :- ఆ ఒక మూడు , నాలుగేళ్ళు అయ్యుండొచ్చు .
సింగ :- వాళ్ళ ఇంటిపక్కనే ఈ మధ్య ఇంకో బిల్డింగ్ వేసారు గా , ఆ బిల్డింగ్ వెయ్యటానికి గాను , సామాను ఈ బ్యాంక్ ఆయన ఇంట్లో పెట్టుకుంటాం అని అడిగారు . 'పోన్లే పాపం' అని ఒప్పుకున్నాడాయన . ఇంక అంతే . ఇనుము , చెక్క , మార్బుల్ రాళ్ళు అన్ని ఆయన ఇంటి సందులో పెట్టించారు .
       కొన్ని సార్లు ఆయన ఉద్యోగానికి వెళ్ళిన సమయం లో ఆ చెక్క పనులు , మిగతా చిన్న చితకా పనులూ కూడా వాళ్ళ సందులో చేయించేసారు . దానికి కూడా 'పోన్లే పాపం ' అని ఊరుకున్నాడాయన .
      చివరికి ఆ సందు నానా భీభత్సం గా తయారయ్యి , వాళ్ళు వదిలేసిన ఇనుము , చెక్క ముక్కలు అప్పుడప్పుడూ కాళ్ళలోకి దిగుతున్నాయని , మొన్ననే ఆ సందూంతా సిమెంటు చేయించి , ఆ సందు గోడ మట్టికొట్టుకుపొయిందని మళ్ళీ వెల్ల వేయించాడు .మొత్తం ఒక అరలక్ష ఖర్చు .

లింగ :- మరి ఆ పక్కింటివాళ్ళు ఏమీ చెయ్యలేదా ?
సింగ :- చేసారు , గృహప్రవేశానికి అరిటాకులు కావాలని వీళ్లనే అడిగి పట్టుకెళ్లారు .
లింగ :- ఎవో కొన్ని ఆకులు పట్టుకెళితే , దానికే ?
సింగ :- ఆకులు మంచివి కావాలని మొత్తం చెట్టునే పీకిపడేసారు .
లింగ :- ఒహో అలా అంటావా ! అయితే తప్పు .
సింగ :- కాని ఇలా ఎవరో ఉపయోగించుకున్నారని , అసలు ఉపకారమే చెయ్యననటం తప్పేమో రా , మనిషిగా పుట్టిన వాడు సాటి మనిషికి సాయం చెయ్యాలి . ప్రతీ రోజూ ఒకలా ఉండదు , ప్రతీ మనిషీ ఒకలా ఉండడు. పారే నదికి నీరు అందివ్వటమే లక్షణం. వికసించే ప్రతి పువ్వుకీ నవ్వులు పంచటమే లక్షణం . మనిషి అని అనుకోవల్సిన ప్రతి వాడికీ ఉపకారం చెయ్యటమే లక్షణం .
లింగ :- అవునా , ఐతే నాకో ఉపకారం చెయ్యి .
సింగ :- చెప్పరా ఏం కావలో .
లింగ :- కొంచెం టైట్ గా ఉంది , ఒక వెయ్యి ఉంటే సర్దు .
సింగ :- వెయ్యా .... (ఎదురుగా పోతున్న ఎవడో మనిషిని పలకరించి ) హలో సుబ్బారావుగారు , ఏంటి నన్ను రమ్మంటారా .. ( అని లింగరాజుకేసి తిరిగి) ఒక్కనిముషం రా లింగా ... అని చెప్పి వడివడిగా జారుకున్నడు సింగరాజు

స్నేహం

2012-02-01T23:16:00.000-08:00

నిర్జీవపు నిశీధి నిండిన హృదయంలో
మరణించిన మనశ్శాంతికి సంజీవని స్నేహం

వెంటనడిచే నీడ కూడా వెక్కిరించే వేళల్లో
కంటతడిని కాచేటి ఓదార్పు స్నేహం

కన్నూ మిన్నూ కానని అహంకారంలో
నిన్ను నీకు తెలియజేసే గుణపాఠం , స్నేహం

పసితనపు ఆటలనుండీ
పండుముదుసలి బోసినవ్వులవరకూ
పంచుకునే చెరిసగమే స్నేహం

ప్రేగు బంధం కాదిది ,
ప్రేమ ఆకర్షణ కానిది

తన నిరుపేద సఖుని పిడికెడు ప్రేమకి
నిలువెల్ల కరిగిన జగన్నాధుని హృదయమిది .

--కాపీరైటు @2012 కళ్యాణ్

పశువుల కాపరి ఆత్మతత్త్వం

2012-01-30T23:12:00.000-08:00

సూర్యోదయానికి ముందు గాఢమైన చీకట్లు మెల్లగా కరుగుతున్న సమయం.
గోదావరి ఒడ్డు దగ్గర ఉదయపు సంధ్యావందనం పూర్తిచేసుకుని , శిష్యులతో వేదవిధానాల గురించి , ఆత్మతత్త్వాన్ని గురించి చర్చిస్తూ వస్తున్నాడు ఒక గురువు .

'గురువుగారు , ఆత్మ అంటే ఏంటి అండి ? ' అంటూ ఒక శిష్యుడు ఆతృతగా అడిగిన ప్రశ్నకి సమాధనంగా వివరణ ఇస్తూ ..

' సర్వాన్ని సాక్షిగా వీక్షిస్తూ , మాయకీ , మార్పుకీ అందనిదే ఆత్మ ' అని చెబుతున్నాడు గురువు .

వారి సంభాషణ ఈ విధంగా సాగుతూండగా ,ఎదురుగా ఒక పశువులకాపరి అప్పుడేలేచి తన విధులకి తయారవుతూ వీరి సంభాషణ విన్నాడు.

ఆ రోజు రోజంతా అదే విషయం అలోచిస్తూ గడిపాడు ,' సర్వాన్ని సాక్షిగా వీక్షించటం ' అనేది వాడి మనస్సుకి బాగా హత్తుకుపోయింది . అసలు అలా ఉండటం కుదురుతుందా అనే ఆలోచన వాడి మనస్సులో మొలకెత్తింది . ఇదేదో ప్రయత్నిస్తేగాని అర్ధం అవ్వదనుకుని , అప్పటినుండీ అన్నిటినీ కేవలం సాక్షిగా చూడటం మొదలు పెట్టాడు .

మొదట్లో అలా ఉండటం అస్సలు కుదరలేదు. మరీ ముఖ్యంగా భావోద్వేగాల విషయంలోనూ , ఆకలి దప్పుల విషయంలోనూ ఇది అసలు సాధ్యం కాలేదు. ఒక పక్షం రోజుల తర్వాత ఇది మన వల్ల కాదు వదిలేద్దామనుకుని , కర్ర భుజమ్మీద వేసుకుని ఇన్నాళ్ళ తన ప్రయోగం గురించి పునరాలోచన చేస్తూ అల నది వడ్డున కూర్చున్నాడు .

ఎదురుగా ప్రవహిస్తున్న గోదారి అలలు , మెల్లగా వీస్తున్న తెమ్మరలు , నది అలలమీద నుండి వీచే గాలి చప్పుడు అన్నీ ఒక రకమైన ధ్యానానుగుణమైన వాతవరణం కల్పిస్తూ ఉండగా , ఆ పశువుల కాపరి దృష్టి ప్రవహిస్తూన్న నదిమీద పడింది . ఈ క్షణం కనపడిన అల , మరునిముషం అక్కడ ఉండట్లేదు . ఈ క్షణం తనను స్పృశించిన గాలి , మరునిముషం ఎక్కడకి వెళ్తోందో తెలియట్లేదు. కొత్త కొత్త అలలు పుడుతూనే ఉన్నాయి , కొత్త కొత్త అనుభూతులను గాలి కలిగిస్తూనే ఉంది . కాని ఆ నది స్వరూపం , ఆ గాలి స్వరూపం మటుకు మారట్లేదు. అల కొత్తదైనా పాతదైనా , నదికి ప్రవహించటమే లక్షణం , ఇదంతా ఎదో విశ్వరచనకు లోబడి సాగుతూన్నట్టుగా తోచింది ఆ పశువుల కాపరికి.

' గురువుగారు అన్న ఆ ఆత్మ తత్త్వానికి , గోదారి తల్లి బోధిస్తున్న ఈ విశ్వరచనకి ఎమైనా సంబంధం ఉందా ?' అంటూ మళ్ళీ వాడి మదిలో ఒక ప్రశ్న మొలకెత్తింది .

దీర్ఘాలోచనలోన చేస్తూ వాడు సమాధి స్థితిలోనికి జారుకున్నాడు . ఒక 20 సంవత్సరాలు అలా గడిచిపోయాయి. ఆ పశువుల కాపరి చుట్టూ పుట్టలొచ్చేశాయి .

అంతకుముందు ఆత్మ గురించి చెప్పిన గురువు పరమపదించారు , ఆత్మ గురించి అడిగిన శిష్యుడు ఆ గురువు మఠానికి ఆచార్యుడయ్యాడు.

అలా ఒకనాటి సాయంకాలం , ఆ పశువుల కాపరి సమాధి నుండి మేల్కొని తన స్థితిని గమనించుకుని అక్కడ నుండి లేచి నడుచుకుంటూ వెళ్ళిపోయాడు.
ఈ రెండు దశాబ్దాలుగా , ఏ భావోద్వేగాలూ , ఏ రసస్పందనలు , ఏ ఆకలి దప్పులు లేని స్థితిలో తనను నడిపించిన చైతన్యం ఎదైతే ఉందో , ఆ చైతన్యపు విశ్వరచన యొక్క లిపి కొంత అవగతమయ్యేసరికి తనను తాను మర్చిపోయి ఆ తత్త్వం యొక్క ఆద్యంతాలను నిరంతరం దర్శించాలని తపిస్తూ ముందుకు సాగిపోతున్న అ పశువుల కాపరికి , దూరంగా మైకు నుంచి వినపడుతున్న ఒక పండితుడి మాటలు వినిపించాయి .

' సర్వాన్ని సాక్షిగా వీక్షిస్తూ , మాయకీ , మార్పుకీ అందనిదే ఆత్మ ' అని చెబుతున్నాడు ఆ వక్త . ఆ వక్త ఎవ్వరో కాదు , పూర్వం ఆత్మ గురించి అడిగిన శిష్యుడు మరియు నేటి ఆచార్యుడు .

తనకు ఆత్మ బోధ చేసిన ఆ గురువు ఙ్ఞాపకం వచ్చి ఒక సారి చూసివద్దామని అటువైపు వెళ్ళాడు ఆ పశువులకాపరి .

ఆ ప్రవచనం వినపడుతున్న సభాప్రాంగణం అంతా విద్యుద్దీపాలతో , మైకుల హోరుతో , భక్తుల వరుసలతో కిట కిటలాడిపోతోంది . అంత మంది లో చినిగిన బట్టలతో , జడలు కట్టేసి , వికృతంగా ఉన్న ఆ పశువులకాపరిని చూసి , ఆ ఆచార్యుని శిష్యవర్గం తరిమివేసింది .

' ఛీ ! శౌచంలేని వాడా , ఇటు రాకు .. పవిత్రమైన ఈ ప్రాంగణం పాడుచెయ్యకు ' అంటూ ఆ ప్రవచనానికి వచ్చిన వారందరూ ఆ పశువులకాపరిని తన్ని తరిమివేసారు .

'నైనం ఛిందంతి శస్త్రాణి ...' అంటూ భగవద్గీతనుండి శ్లోకం మైకు నుంది వినపడుతూంది .

ఒక చిరునవ్వు నవ్వి అక్కడ నుంచి నిష్క్రమించాడు ఆ పశువుల కాపరి .

వెతుకుతున్నాను ..

2011-12-13T23:39:00.000-08:00

వేల అడుగుల నీడల నడుమ,
వేల ఊపిరుల జాడల మధ్య ,
వెన్నంటి వచ్చే నీ వ్యక్తిత్వాన్ని
ఒంటరిగా వెతుకుతున్నాను ..

ఆశల శిఖరపు అంచుల చివర
నిరాశల అగాధపు లోతుల లోపల
విస్తరించిన నీ విశ్వరూపాన్ని
గుర్తుపట్టలేక వెతుకుతున్నను ..

నా ఊపిరి అలలను మోసే కడలివై
నా ఊహల మెరుపులను భరించే మిన్నువై
నా ఇంట్లోనే ఉన్న నిన్ను
ఊరంతా వెతుకుతున్నాను ...

విరహం తొలగి
నిరీక్షణ కరిగి
నిన్ను చూసే ఒక్క క్షణం కోసం
లక్షల యేళ్ళుగా వెతుకుతున్నాను

నా మొదటి శతకం - కొన్ని పద్యాలు

2011-12-07T21:59:00.000-08:00

తెలిసె నేఁడు నాకు తెలుగులో మాధుర్య
మందమైన భావమంకురింప
తెలుగు తరచి చూడఁ దేనె ధారలు జారు
చక్రి పలుకు వినుఁడు సత్య వాక్కు

అంబరంబునంటు హర్మ్యాళి నిర్మించె
విశ్వమంత నిలిచి విస్తుబోవ
మనిషి మింటికేగె మరిచి తన భువిని
చక్రి పలుకు వినుఁడు సత్య వాక్కు

వింతగొలుపుఁ జూడ విత్తు మొలచు తీరు
నెదుగు నేల గుణముకెదురు నిలిచి
స్థితులు గతులు వెతలు స్థిరచిత్తునాపునే ?
చక్రి పలుకు వినుఁడు సత్య వాక్కు

తాతలిడిన యాస్తి తమగొప్పగన్ జూపి
విర్రవీగు చుంద్రు వింత గాను
తెలిసికొనఁగవారు తెలివైన సోమరుల్
చక్రి పలుకు వినుఁడు సత్య వాక్కు

కులము పేర ఖలులు కూడఁగట్టు బలిమి
మానవత్మమెదుట మనఁగఁబోదు
తిమిరచయము తొలఁగు దినకరద్యుతి సోక
చక్రి పలుకు వినుఁడు సత్య వాక్కు

ఎదురీత..

2011-11-23T22:23:00.000-08:00

దుడుకు అడుగుల శిశిర గాడ్పులకి ,
తల్లి ఒడి నుండి వేరు పడి ..
కొండలనకా , గుట్టలనకా ...
పిల్లగాలులతో కలిసి తిరిగి ....
దుమ్ము ధూళిలో కలిసిపోయి ,
వేల అలజడుల బరువు మోసి,
వేల అడుగుల కింద నలిగి ,
ఇల్లుని విడిచి , తల్లిని మరిచి
ఒక నిర్జీవ కుడ్యపు సన్నని బీటలో చేరి
సేదతీరింది ఒక చిన్ని విత్తనం.

హితులు కరువై , భవిత బరువై
బ్రతికే దారిని ,
ఆ బీటలో పరుచుకున్న నిశీధిలో వెతుక్కుంటూ ..
చిట్టి చేతులతో ఆ గట్టి గోడను
తవ్వుకుంటూ ...
సాగిపోతున్న ఆ విత్తుని
హత్తుకుంది
ఒక ఉదయపు అనాధ మంచుకణం.

బ్రతుకు దొరికింది ..
భవిత నిలిచింది ...
వెతుక్కుంటూ ఒక సూర్య కిరణం
ఆ విత్తనాన్ని పలకరించింది ...
కలిసిరాని కాలంతోనే సాగుతూ
వెక్కిరించిన విధినీడనే మెలుగుతూ , వెలుగుతూ
కొన్నాళ్ళకి ..
గుండెలేని ఆ గోడ పైన
పచ్చని హరితం , వసంతాన్ని స్వాగతించింది ..

రిక్త హస్తాలతో...

2011-11-22T21:53:00.000-08:00

నాకు నచ్చిన ముళ్ళ దారిని వదిలి ..
నలుగురూ నడిచే రాజ మార్గం లో అడుగులు వేసాను ..
దారి అనువుగా ఉందో లేదో చూసానే గాని ..
గమ్యం చేరుస్తుందో లేదో అడగడం మరిచాను ..

సాటివారి పై బురదజల్లాలని ..
ఆలోచిస్తూ కాలం గడిపాను ..
వాళ్ళని తిట్టే తాపత్రయంలో ..
నా చేతులకి నేనే బురద చేసుకున్నాను ...

మళ్ళీ ఎదగమని నువ్వు ఇచ్చిన ..
ఎన్నో ఉదయాలని వ్యర్ధం చేసుకుని ...
మళ్ళి బ్రతకమని నువ్వు విదిల్చిన ..
ఎన్నో ఊపిరులని గాలికి వదిలేసి ..
రిక్త హస్తాలతో నీ ముంగిట..
యాచిస్తూ నిలిచున్నాను ..

కొత్త ఉదయం ప్రసాదించమని ..
కాస్త ఇంగితం ప్రచోదించమని .

కాపీరైట్@కళ్యాణ్ 2011

ఆత్మవిశ్వాసం

2011-11-02T07:04:00.000-07:00

ఎదురొచ్చే కష్టాలని ,
ఎదిరించడంలోనే ఉంది విజయం ...
కదిలొచ్చే కెరటాలని
చీల్చుకుంటూ పోయేదే పయనం ...

కలిసి రాని కాలపు బలాన్ని తిట్టుకుంటూ వదిలేస్తామా ?
నిబ్బరంగా సంకల్పంతో తట్టుకుని నిలబడలేమా ?

వెన్నుచూపే వారిని , వారి నీడకూడ వెక్కిరిస్తుంది ...
నిన్ను నువ్వే నమ్ముకుంటే , ఆ మిన్ను కూడా వంగి వస్తుంది ...

సమస్యల చీకటి లో ఇంక కన్నీరు తో మిగిలిపోదామా?
గెలుపనే వెలుతురు వెతుకుతూ , చిరునవ్వుతో సాగలేమా ?

అవ్యక్తం

2011-10-29T04:02:00.000-07:00

ఒక ఉదయం,

అటూ ఇటూ విచే అల్లరి గాలులకి,ఎగురుతూ సాగుతూన్న ఒక యెండుటాకు ,'చిటపటా' చప్పుడు చేసుకుంటూ , ఒక వృద్ధ వృక్షపు నీడలోకి వచ్చి ఆగింది ... ఒక సారి ఆ చెట్టుని ఎగా దిగా చూసి ఎదో గుర్తుకుతెచ్చుకునేందుకు ప్రయత్నిస్తోంది ..

' మసక బారిన ఙ్ఞాపకాల గదుల్లారా !
మరుపు నిండిన నా మస్తిష్కపు పొరల్లారా !
   ఏదో తెలియని అభిమానం ,
   ఈ నీడన నాలో చిగురిస్తోంది
   ఎన్నో ఏళ్ళ ఒక పరిచయం ,
   మళ్ళీ ఇక్కడ పలకరిస్తోంది .
ఎక్కడిదర్రా , ఈ మధుర గానం , ఇంకా ఎదలో మోగుతోంది ..
ఎప్పటిదర్రా , ఈ పులకింతల పరిచయం , తలపుల్లో ఇంకా మెదులుతోంది ? '

అని ప్రశ్నించింది .. అది విని ఆ చెట్టుకి ఉన్న ఆకులు గల గలా నవ్వాయి , 'ఈ ముసలి ఆకుకి రాలిపొయినా ఇంకా మతిమరుపు పోలేదు ' అని కొన్ని పిల్ల గాలులు తమలో తాము గుసగుసలాడుకున్నాయి .. అది విని ఆ ముసలి ఆకు మనసులో మొలిచిన చిన్న పౌరుషపు తాకిడికి తన స్వరం కాస్త హెచ్చించి ఇలా అంది ..
' నవ్వులాటలే మీకు పిల్ల గాలుల్లారా ,
దుడుకు నవ్వులే మీకు కొత్త ఆకుల్లారా ?
ఉడుకు రక్తపు దుడుకు , ప్రాయముడుగినప్పుడు ఉండబోదు
నేటి మీ సూర్యోదయం , నా రేపటి సంధ్య ముందు నిలువబోదు
అప్పుడు మీ బోసినోళ్ళతో వెర్రి నవ్వులు నవ్వుదురులే
ఆనాడు మీ పలుకుల వాడి ఎంతో నేనూ చూస్తానులే '

అని ఉక్రోషంగా పలికింది , ఆ పలుకులకి నొచ్చుకుని కొన్ని పిల్లగాలులు గట్టిగా వీచాయి , ఆ గాలికి , చెట్టు నుంచి మరొక ఆకు రాలి ,కింద ఈ ఆకు పక్కనే పడింది , పడీ పడగానే తన నేస్తమైన ఈ ఎండుటాకుని చూసి ఆనందంతో హత్తుకుంది ,

' బాధల కెరటాలు , సంతోషపు ముత్యాలు
గంభీరంగా మోసే కడలే ఈ కాలం
కలిసీ కలువని భూమీ ఆకాశపు
సరిహద్దు రాజ్యమే ఈ కాలం
ఆయువయ్యిందని , ఊపిరాగిందని , రాలిపొయిన నా మనసుకు
మరునిముషం లోనే నిన్ను చూపించి చిగురింపజేసింది ఈ కాలం '

అని మురిసిపోతూ తను ఎవ్వరో ఆ ఎండుటాకుకి ఙ్ఞాపకం చేసింది , దూరంగా ఎప్పుడో తను రాలిపొయినప్పుడు ఏర్పడిన గుర్తుని చూపించింది .అప్పుడు గుర్తొచింది ఆ ముసలికి , అది తన ఇల్లని , ఆ చెట్టు తన అమ్మని ... తను రాలిపోయినా ఇంకా తను వదిలి వెళ్ళిన గుర్తులని మోస్తున్న తన తల్లి ని చూసి ..
'గుండె తడి అయినా
మనసు చెమ్మగిల్లినా
చుక్క కన్నీరయినా మిగలని
అలసిపొయిన ఎండుటాకుని '

అని బాధ పడుతూంటే , చెట్టు మీదున్న మంచు కరిగి , ఆ తల్లి వృక్షపు కన్నీటి బిందువై ఆ ఎండుటాకుని తడిపింది ..

నా (పగటి)కలల సుందరికి ..

2011-10-27T03:42:00.000-07:00

(సినెమాలు చుస్తూ , ఎవేవో ఊహించుకుంటూ పగటి కలలు కనే , ఆ అమాయకత్వం , కాలక్రమేణా కనుమరుగవుతుంది , కాని ఆ ఙ్ఞాపకాలు మాత్రం మిగిలిపొతాయి .. )

కలవై కనులకు కనిపించావు
చిరునగవై పెదవికి పరిచయమయ్యావు

ఊహల అలపై ఊయలలూపి
కొత్త తీరాలని మనసుకి చూపి

ఏ ఆవిరి తెరల మాటుకు మాయమయ్యావు?
ఒక మంచుశిల్పానివై మిగిలిపొయావు ..

పగటికలల నీ ధ్యానం లో , నా ప్రాయం
మధుర ఙ్ఞాపకమై మిగిలిపొయింది
పరిణితి అనే మౌనంలో , నా కర్తవ్యం
ఒక చేదు నిజంగా ఎగసి వచ్చింది .

ఒక రైతు కథ

2011-10-27T02:58:00.000-07:00

తూర్పు తెల్లవారుతుండగా , గూళ్లలోని పక్షిపిల్లల సవ్వడులు పల్లెలో పరుచుకుంటూ , తెల్లవారిందని అందరికీ తెలియచేస్తూ ఉండగా , పెద్ద కరణం గారి ఇంటి సందుకి ఆనుకుని ఉన్న చిన్న బురద దారి గుండా సాగుతున్నాయి రాములు అడుగులు ...

'ఏరా రాముడూ , పొలానికా ? '
ఏదో పరధ్యానం లో ఉన్న రాములుని ,అప్పుడే నిద్ర లేచి , చెంబు పట్టుకుని ఎదురు వస్తూ పలకరించాడు సూరి .
నోటితో ఏమీ చెప్పకుండానే అవునన్నట్టు తలూపాడు రాములు.

'ఏంటీడు , ఇలా ఉన్నాడు ?' అని మనసులో అనుకుంటూనే ,'మనకెందుకులే ఈ సమయంలో ' అనుకుని వడి వడి గా ముందుకు వెళ్ళిపొయాడు సూరి.

దూరంగా రామాలయం మైకు నుంచి పూజరి గారి వేద పాఠం వినపడుతోంది , ఆ మంత్రాలేంటో అర్ధంకాకపోయినా , చిన్నప్పటినుంచి ఉన్న అలవాటు వల్ల చేతులు అప్రయత్నంగానే అటువైపు తిరిగి నమస్కారం పెట్టాయి , కళ్ళు ముసుకుని 'జై శ్రీరాం ' అనుకుని మళ్ళీ తన నడక కొనసాగిస్తున్నడు రాముడు.

కొద్దిగా ముందుకు సాగగానే , ఆ మంత్రాల మహిమ వల్లనేమో , తప్పుచేస్తున్న భావం మొలకెత్తింది రాముడిలో , నెమ్మదిగా ఙ్ఞాపకాలు దొంతరలుగా కళ్ళ ముందు కదలాడసాగాయి ...

చిన్నపుడు ఇలాగే తెల్లవారుతుండాగానే , తన తండ్రి తనని పొలానికి తీసుకువెళ్ళేవాడు . దారిలో రాముడి గుడి ముందు ఆగి ఒక దణ్ణం పెట్టి , సన్నగ తనలో తాను ఒక పాత పాట పాడుకుంటూ , మధ్య మధ్యలో తన పంచె బొడ్దు లో దాచుకున్న చుట్టల్ని తడుముకుంటూ , వచ్చేపోయేవాళ్ళని మనసారా పలకరిస్తూ , వడివడిగా పెద్ద పెద్ద అంగలేస్తూ సాగిపొతున్న తన కన్నతండ్రి , తన కళ్ళముందు ఇప్పటికీ కదలాడుతూనే ఉన్నాడు . ఎంత కష్టమైనా నవ్వుతూ ధైర్యంగా ఎదుర్కొన్న తన తండ్రిని గుర్తుచేసుకుంటూంటే కొంచెం గర్వం , కొంచెం బాధ కలిగాయి రాములుకి .

అలా ఙ్ఞాపకాలని నెమరువేసుకుంటూ నాలుగు అడుగులు ముందుకు వేయగానే , పూజరిగారి ఇంటి ముందు కళ్ళాపు జల్లుతున్న పనిమనిషి కనపడింది .

వెంటనే తన తల్లి గుర్తుకు వచ్చింది. తెల్లవారకుండానే బయల్దేరి నాలుగిళ్ళల్లో పాచిపని చేసి , వాళ్ళ ఇంటెడు సామాన్లూ తోమి ,బట్టలు ఉతికి , మళ్ళీ వెనక్కి వచ్చి తన తండ్రికి చద్దన్నంలో ఉల్లిపాయముక్క , ఒక పచ్చిమిరపకాయ పెట్టి , అది తిని పొలానికి బయల్దేరుతున్న తన తండ్రిని గుమ్మంవరకూ వచ్చి సాగనంపే ముత్తైదువు తన తల్లి , అలసట అన్నది ఎన్నడూ మొహం లో చూపించని తన తల్లిని తలుచుకుంటూంటే అప్రయత్నంగా కళ్ళమ్మట నీళ్ళు తిరిగాయి రాములుకి .
మనసులో తప్పు చేస్తున్న ఆలోచనలు మళ్ళీ లేచాయి . గట్టిగా తన తువ్వాలు చాటూన దాచిన పురుగులమందుని అదిమిపట్టుకున్నాడు.

'మధ్యాహ్నం త్వరగా రండి ,ఈ రోజు ' అన్నం ' వండుతున్నాను ' తన భార్య తనతో ఇందాక పొలానికి బయల్దేరే ముందు అన్నమాటలు గుర్తుకొచ్చాయి . చాల రోజుల తర్వాత తన ఇంటిలో 'అన్నం ' వండబడుతోంది , అది కూడ తన భార్య వంటి మీద ఉన్న ఆఖరి బంగారపు గాజు అమ్మిన డబ్బుతో .

'పొలానికి తీసుకున్న అప్పు , వారం లో కట్టకపోతే పొలాన్ని జప్తు చేస్తాం ' అని వారం క్రితం బ్యాంక్ వారి మాటలు కూడా గుర్తుకొచ్చాయి.

భారంగా నడుస్తున్న రాములుకి దూరంగా తన పొలం కనపడుతోంది .

నిట్టురుస్తూనే తన పొలం చేరుకుని , బీటలు తీసిన తన పొలం మధ్యలో కూర్చున్నాడు . ఎన్నో ఆలోచనలతో మనసంతా గందరగోళంగా ఉంది . అప్పటివరకు దాచిన పురుగులమందుని తీసి పక్కనపెట్టి , 'ఎప్పుడు తాగాలా ?' అని ఆలోచిస్తూ మళ్ళీ తన గతంలోకి వెళ్ళిపొయాడు .
తన పొలం పక్కనే ఉన్న అయిదు ఎకరాల యజమాని , తన ప్రాణ స్నేహితుడి ఆఖరి మాటలు గుర్తుకొచ్చాయి ..
' ఓడిపోయాను రా రాముడూ ! నేలని నమ్ముకుని బ్రతుకుతున్న మనకి , నమ్మి కొలిచిన దేవుడూ , నమ్మి ఓటేసిన నేతలూ , ఎవ్వరూ నీళ్ళివ్వలేదు . నీళ్ళైతే దొరకలేదు గాని , పురుగులమందు మటుకు అప్పు మీద దొరికింది . నేను చేతకానివాడ్నే గాని, పిరికివాడిని అని మాత్రం అనుకోవద్దు ' అని రాసి పంటకోసమని కొన్న పురుగులమందు తాగిన తన స్నేహితుడు గుర్తుకొచ్చాడు .

గత ఎన్నికలలో ' మీ నీళ్ళకోసం నా ప్రాణలైనా ఇస్తా ' అని ప్రతిఙ్ఞ చేసిన ఎమ్మెల్యే గుర్తుకొచ్చాడు .

వందలకొద్దీ ఆత్మహత్యలు చేసుకున్న తన లాంటి సన్నకారు రైతులు గుర్తుకొచ్చారు , ఆవేశం , ఆక్రోశం , అసహాయత ఇలా భిన్నమైన భావాల మధ్య భార్య 'అన్నం ' వంట ఙ్ఞాపకం వచ్చింది .

ఆఖరిసారి అన్నం తిని చచ్చిపోదామనిపించి , పురుగులమందుని మళ్ళీ జాగ్రత్తగా తువ్వాలు వెనక దాచి , నెమ్మదిగా ఇంటివైపుకి నడక సాగించాడు ..

అలా తన ఇంటి దరిదాపులలోకి చేరుకున్నాకా , ఆమడ దూరం లో ఏదో ఆగి ఉన్న కారు గమనించాడు.
ఎవరో పెద్దవాళ్ళు , తన చుట్టుపక్కల వాళ్ళతో మాట్లాడుతున్నారు , ఎవో కాగితాలు , ఫైళ్ళు పట్టుకుని ఉన్నారు వాళ్ళు .

'ఏమి జరుగుతోందో ' అని కుతూహలం ఉన్నా ,' మనకెందుకులే ' అని సర్దిచెప్పుకుని , తన ఇంటికి వెళ్ళి భోజనం పెట్టమని భార్యకి చెప్పి , కాళ్ళూ చేతులూ కడుక్కుని కంచం ముందు కూర్చున్నాడు . భార్య చూడకుండా పురుగులమందు కొంచం పప్పులో కలిపి తాను వేసుకుని , తను లేకపొతే తన భార్య అనాధ అయిపొతుందని కొంత తన భార్య కి కూడా వేసి , తృప్తి గా కడుపారా తిని భుక్తాయసం తో ఆరుబయటకి వచ్చి కూర్చున్నాడు రాముడు .

నిత్యం ఎదో పాటలు పాడుతూ పని చేసే తన భార్య ,వంటింటిలోకి వెళ్ళి , అరగంట అయినా ఏమీ శబ్దం చేయకపోయేసరికి 'మందు పని చేస్తోందేమొ ' అని ఆనందపడుతున్న రాముడికి ఎదురుగా ఇద్దరు పెద్దమనుషులు నిలుచున్నట్లు కనపడ్డారు ... చూపు నెమ్మదిగా మసక బారుతోంది ... ఆఖరి క్షణాలు వస్తున్నట్టు తెలుస్తోంది ... ఇంతలో ఆ పెద్దమనుషుల్లో ఒకరు ..

' ఇక్కడ ప్రభుత్వం ఒక శెజ్ కట్టడానికి పర్మిషన్ ఇచ్చింది , కాబట్టి మీ భూమి ప్రభుత్వ ధరల ప్రకారం మేము కొంటాం , ఇంకా మీకు ఒక ఉద్యోగం కూడా ఇప్పిస్తాం ..'' అంటూ ఇంకా చెప్పబోతున్నవాళ్ళకి ఎదురుగా కుప్పకూలిపోతూ , చిద్విలాసంగా ఆఖరిసారి చిరునవ్వు నవ్వుతూ కనపడ్డాడు రాముడు.

ఊరు మూగపొయింది .

మరొక సారి సూర్యుడు భారంగా అస్తమించాడు.
.........
............
...............
.................

కొసమెరుపు :- పట్నం లో ఉన్న పెద్దాసుపత్రి లో మెల్లగ కళ్ళు తెరిచాడు రాముడు , పక్కనే ఉన్న మంచం మీద ఉంది తన భార్య , అప్పుడప్పుడే తను కూడా కళ్ళు తెరుస్తోంది. తన పక్కనే నుంచుని ఉన్న సూరిగాడు , కళ్ళనీళ్ళతో రాముడి పక్కకు వచ్చి , చడామడా నాలుగు తిట్టి , కొట్టినంత పనిచేసి , ఇంకెప్పుడూ ఇలాంటి వెధవ పని తలపెట్టనని వొట్టు పెట్టించుకున్నాడు. తన పొలం కొనడానికి వచ్చిన ఆఫీసర్లే తనని కారు లో తీసుకొచ్చి ఆసుపత్రి లో చేర్పించారని చెప్పాడు .

'మరి ఆ పురుగులమందు ?' అని రాముడు అమాయకంగా అడిగాడు ..

'నీ అదృష్టం , అది కల్తీ మందు ..., పంటకే కాదు మనుషులకి కూడ పనిచెయ్యదు ' చెప్పాడు సూరి.

ఆడపిల్ల

2011-06-25T05:03:00.000-07:00

వేసవి సెలవలు అయిపోవచ్చాయి ... ఇన్నాళ్ళు గా తన ప్రతాపం చూపించిన సూర్యుడు కొన్నాళ్ళు సేద తీరుదాం అని మబ్బుల చాటుకి మెల్లి మెల్లి గా , రోజుకొక మబ్బు వెనుకగా జారుకుంటున్నడు...

అప్పుడప్పుడే పురుడు పోసుకుంటున్న వాన చినుకులు తమతో పాటు కాంతమ్మ గారింట ఒక శుభవార్త మోసుకొచ్చాయి ... ఆవిడ కూతురు రాజ్యలక్ష్మి నెలతప్పింది , కాంతమ్మ గారి మొదటిమనవడు బుడుగు గాడికి ఒక చిట్టి చెల్లెలో / తమ్ముడో పుట్టబోతున్నారని ..

రోజూ బంధువులందరి దగ్గర నుండీ ఫోనులు వస్తున్నాయి ... బుడుగు గాడి అమ్మమ్మ,తాతయ్య వాళ్ళ పల్లెటూరు నుంచి బొబ్బట్లూ , జంతికలూ , సున్నుండలూ చేయించి కూతురుకి ఇష్టం అని తీసుకొచ్చారు , అందరూ ఎంతో సంతోషంగా రాజ్యలక్ష్మిని ఆప్యాయంగా చూసుకుంటూ మురిసిపోతున్నారు ..

వానలు , బంధువులూ చెప్పిరావన్నట్టు , ఈ వానలతో పాటు చాల యేళ్ళుగా అమెరికాలో స్థిరపడ్డ సూర్యం "మావయ్య" కూడా బయల్దేరి వచ్చాడు ... వస్తూ వస్తూ ఈ శుభవార్త విని అమెరికా స్టయిల్లో "కంగ్రాట్స్ సిస్టర్" అంటూ చేతులు ఊపి , తన బావగారైన బుడుగు గాడి నాన్న కేసిచూసి చిన్నగా కన్నుకొట్టి , బుడుగు గాడిని ఎత్తుకుని "ఏరా , నీ తమ్ముడికి ఏం పేరు పెడదాం ?" అని అడిగాడు ..

"నాకు చెల్లెలు పుడుతుంది మామయ్య , మహాలక్ష్మి లాంటి పిల్ల పుడుతుందని బామ్మ చెప్పింది " అని బుడుగుగాడు అమాయకంగా చెప్పాడు.

వెంటనే సూర్యం మామయ్య శ్రీకృష్ణుడైపొయి బుడుగుగాడ్ని అర్జునుడిగా చేసేసి , " ఆడపిల్ల శాపం రా , మీ నాన్న అది పుట్టినప్పటి నుండీ దాని ముద్దూ ముచ్చటా తీరిస్తే , చివరికి ఎవర్నో చేసుకుని వెళ్ళిపోతుంది .. దానికి చదువు దండగ , ఇంక అల్లుడి కోర్కెలు తీర్చేసరికి మీ నాన్న పని అంతే , ఇవన్ని నీకర్ధంకావుగాని , గుర్తుంచుకో ఆడపిల్ల కంటే మగవాడు ఎంతో నయం " అని తన ప్రవచనం పూర్తి చెసేసరికి , బుడుగుగాడు యేమీ అర్ధం కాక ఏమి చెయ్యాలో తెలియక వాడి బామ్మ దగ్గరకు పరుగున వెళ్ళి ఆవిడ వళ్ళో కూర్చుని .." ఆడపిల్ల మంచిది కాదంటగదే బామ్మ , మామయ్య అన్నాడు " అని అదిగాడు .. వాడి బామ్మే వాడి యూనివర్సిటీ మరి ..

చిన్నపిల్లాడికి ఇలాంటి విషయాలు ఎలా చెబితే అర్దం అవుతుందో ఆవిడకి బాగ తెలుసు ..

"అది పక్కన పెట్టి , ఒక కథ చెబుతా వింటావ భడవా ?" అని ఆవిడ అడిగింది ..

మామయ్య క్లాస్ తో బుర్ర పాడైపొయిన బుడుగు , ఈ కథ ఆఫర్ ఏదోబాగుందని " సరే" అన్నాడు ..

" అనగనగా , ఒక రాజు , ఆయనకి ఒక రాణి , ఆ రాణి గర్భవతి అయ్యింది .. ఆ రాజు సంతోషంగా రాజ్యం అంతా పండగ చేయించాడు ..తొమ్మిది నెలలు ఇట్టే గడిచిపోయాయి ...

ఒక శుభముహూర్తాన రాణికి ఒక ఆడపిల్ల పుట్టింది ..

ఆ పిల్లని బాగా పెంచాడు రాజు , చదువుతో పాటు యుద్ధవిద్యలూ,రాజనీతి అన్ని నేర్పించాడు ..

ఒక మంచి రాజుని చూసి పెళ్ళి కూడా చేసాడు , ఆ ఆడపిల్లకి ఒక పిల్లాడు కూడా పుట్టాడు ... అంతా సంతోషం గా జరుగుతున్న కాలంలో శత్రువులు దండయాత్ర చేసారు ... ఆ పిల్ల భర్త అయిన ఆ రాజ్యం రాజు యుద్దానికి వెళ్ళాడు .. పాపం ఆ పిల్ల ఎంతో భయపడింది .. తన భర్త కోసం ప్రార్ధించింది .. కాని శత్రువులు ఆ భర్తని చంపేసారు " అని అక్కడ ఆపి , " అప్పుడు ఆ ఆడపిల్ల ఏం చెసిందో చెప్పు ?" అని బుడుగుగాడ్ని అడిగింది ..

"అడవిలోకి పారిపోయి , ఎవరో మంత్రగాడిని కలుసుకుంది ... ఆ మంత్రగాడు ఆ పిల్ల కొడుకుని పెద్దచేస్తాడు , మంత్రాలు అవీ నేర్పుతాడు " అంటూ ఒక సోషియో ఫాంటసీ కథ చెప్పాడు వాడు...

"కాదురా .. యుద్దంలో తన భర్త చనిపోతే , ఆ పిల్ల తన కొడుకునీ తన రాజ్యాన్ని రక్షించుకోవటానికి , యుద్దానికి తనే బయల్దేరింది , కొడుకుని వీపుకి చుట్టుకుని , మొదటిసారి కత్తిబట్టి , శత్రువులమీదకి విరుచుకు పడింది , రణరంగం లో సివంగిలా యుద్దం చేసింది , శత్రువులని తరిమికొట్టింది ..." అని చెప్తూంటే బుడుగు గాడు తానే యుద్దంచేస్తున్నంతలా లీనమై వింటున్నాడు ..

"ఆ శత్రువులు ఎవరో తెలుసా -- మన దేశాన్ని బానిసలుగా చేసుకున్న బ్రిటీష్ వారు .. ఆ "ఆడపిల్లే" శత్రువులపాలిట సిం హ స్వప్నం -- వీరనారి ఝాన్సీలక్ష్మీ బాయి " అని ముగించి ...

"అది రా నాన్న ఆడపిల్ల అంటే " అని ముగించింది ..

వెనకాలే తన కొడుకు ఆ అమెరికా సూర్యం నిలబడి చిన్నగా చప్పట్లు కొడుతూ తన తప్పుని తన దేశపు ఆడపిల్లల గొప్పతనాన్ని వింటూ గర్వంగా నుంచుండిపోయాడు

ఎలక్షన్స్ మేస్త్రీ

2011-06-21T07:36:00.000-07:00

ఎప్పటిలానే సాయంత్రం చల్లబడేసరికి గట్టు మీదున్న చెట్టు కిందకి చేరుకున్నాడు లింగ రాజు..ఎదురుగా పెద్ద కలకలం , అంతా హడావిడిగా వస్తూపోతూన్న జనాలతో సందడిగా ఉంది గోదారి గట్టు.. పుష్కరాలకి ఏర్పాట్లేమో అనుకుందామంటే మొన్నామధ్యే అయ్యాయి ... సుబ్రహ్మణ్య షష్టి జాతరకి లేదా దీపావళి అమావాసకి ఏర్పాట్లా అంటే అదీకాదు ... " సినేమా వాళ్ళు షూటింగ్ కోసం వచ్చారేమో " అనుకుంటూ ఆత్రంగా ఎదురుగా వచ్చే రంగయ్య తాతని "హీరో ఎవరు " అని అడిగాడు లింగ రాజు ...

"అప్పుడే చుక్కేసేసావా" అని విసుక్కుంటూ వెళ్ళిపొయాడు రంగయ్య తాత ...

"ఇంకోసారి చుట్టలు తెమ్మని అడుగు చెప్తాను " అని మనసులో అనుకుంటూ .. దూరంగా పోతున్న రత్తమ్మత్త తో .."అత్తో ! హీరోఇన్ వచ్చిందా ?" అని కేకవేసి అడిగాడు ..

"మీ అమ్మమ్మ వచ్చిందిరా సచ్చినోడా !" అని ఇంకా ఎవోతిట్టి వెళ్ళిపొయింది.. "దీని కూతురిని మొన్న కెలికినది ఇంకా మనసులో పెట్టుకుందేమో " అనుకుంటూ అసలు ఏం జరుగుతోందో సొంతంగా చూద్దామని వెళ్ళాడు లింగరాజు

ఎదురుగా ఎత్తైన గద్దెమీద నుంచి సింగరాజు అందరికి ఏవో పురమాయిస్తున్నాడు ...

సింగ :- " సోమవారం అందరూ వచ్చేయండి , మర్చిపోకండి , పార్టీ పేరు గుర్తుందిగా .. చప్పట్లు ఎఫ్ఫుడు కొట్టాలో , ఈలలు ఎప్పుడు వేయ్యాలో మనవాళ్ళు చూపిస్తారు మీరు వాళ్ళని ఫాలో అయిపోండి .. బాగా అరిచినవాళ్ళకి సాయంత్రం మందు ఫ్రీ అని పార్టీ వాళ్ళు చెప్పారు , మరి చూసుకోండి ... పసుపు బట్టలు కాదు , తెల్ల బట్టలు వేసుకురండి ... మర్చిపొయి మొన్నట్లా గులాబీ రంగు వేసుకొచ్చేరు , అది ఇప్పుడు కాదు ముందు ముందు వస్తది " అంటూ ఇంకా ఎవేవో చెప్తున్నాడూ

లింగరాజు ఈ తతంగం అంతా చూసి , అవాక్కయ్యాడు , కొంచెం తేరుకుని

లింగ :- "ఏమిరా సింగా ! రాజకీయ్యాలలోకి వెళ్ళిపోయావా , ఏం పార్టీ ఏంటి ?" అని వ్యంగ్యం నిండిన స్వరంతో అడిగాడు

సింగ :- "ఏడవకు రా , నేనేమీ రాజకీయ్యాలలోకి వెళ్ళలే ! అయినా అక్కడ మన లాంటివాళ్ళకి చోటు లేదు .. అన్నీ నాయకులూ , వారి బంధువులూ పంచేసుకున్నారు

లింగ :- " అయితే ఇదంతా?"

సింగ :- "వ్యాపారం , నేను మేస్త్రీని వాళ్ళు కూలీలు , వ్యత్యాసమల్లా మేము ఇల్లు కట్టము , "జై జై" లు కొడతాం అంతే ,నాయకుడెవడో మాకు అనవసరం , డబ్బులిస్తే జై కొడతాం , ఇంకా ఎక్కువిస్తే వాడ్ని ఊరంతా తిప్పుతాం ... పనికి డబ్బు తీసుకునే ప్రొఫెషనల్ అభిమానులం "

లింగ :- "బాగుందిరా నీ యాపారం ! మరి ఓటు కూడా అలానే వేస్తారా ? మీలాంటి వాళ్ళ వల్లే ఇలాంటి నాయకులు తయారవుతున్నారు.."

సింగ:- " అంతలేదురో ! 65 % ఓట్లు పోల్ అయితే అవన్ని మేము వేసేవే .. వెయ్యనిదల్లా చదువుకున్న ప్రబుద్దులే

పయనం

2011-05-10T07:31:00.000-07:00

ఏ ఎండ మావులకై అర్రులుచాస్తున్నావు

ఏ శూన్యరాగాలకి నీ గొంతు అరువిచ్చావు

ఏ గాఢచీకట్లకి నీ ఉదయం అమ్ముకుంటున్నావు

ఏ వ్యర్ధవాదనలకి నీ కాలం వెచ్చిస్తున్నావు

లెక్కలేనన్ని దారుల మధ్య , దిక్కు తోచక తిరుగుతున్నా

ఆ దారులు చేర్చే గమ్యం ఒకటే అని తెలుసుకోలేకున్నావు

భయం సంద్రంలో , ఆకలి కెరటాలపై

అసూయా ద్వేషం అను జంట నావలతో

సాగిపొయే నిత్యాన్వేషీ , ఓ మనిషీ

ఎటువైపు నీ పయనం? !!

"స్కాము"రాజ్యం

2011-01-24T10:28:00.000-08:00

లింగ :- ఉందిలే మంచి కాలం ముందూ ముందూనా ! స్కాములూ చేసెయ్యొచ్చూ నందా నందానా !

సింగ :- ఎంట్రో ! మంచి హుషారుగా ఉన్నావ్ ? ఆ స్కాములు చేయటం ఏమిటి ?

లింగ :- నీకు ఇంకా తెలీదా ? నేను రాజకీయ్యాల్లోకి వెళ్దామనుకుంటున్నా!

సింగ :- అయితే?

లింగ :- ఇక డబ్బులే డబ్బులూ !

సింగ :- ఏంటి రా నీ వాలకం ? రాజకీయ్యాలకి , డబ్బులకి , స్కాములకి సంబంధం ఏంటి? పవిత్రమైన ప్రజాసేవా పధం లోకి వెళ్తానంటూ , ఈ స్కాములు గోల ఏంటెహై !

లింగ :- ఏ ఊరు రా మీది ? గ్రహాంతరవాసి లా మాట్లాడుతున్నావ్ .. ప్రజా సేవా ! జోకులెయ్యకురో , ఆ పదానికి అర్ధంకూడా తెలీదు మన నాయకులకి ! ఏది దొరికితే దానితో స్కాములు చేసెయ్యటం తప్ప , ఇలాంటి కఠిన పదాలని కనీసం నేర్చుకోనైన నేర్చుకోరు ..

సింగ :- మరి మన టంగుటూరి ప్రకాశం పంతులు గారు, లాల్ బహదూర్ శాస్త్రి గారు , ఇలాంటి వారందరు కూడా రాజకీయ్యాల్లో ఉండిన వారే గా , వారు మరి కడిగిన ముత్యం లా స్వచ్చంగానే బ్రతికారు గా ?

లింగ :- అందుకే వాళ్ళ విగ్రహాలు గాని , ఫొటోలు గాని మనకి పెద్దగా కనపడవు ఎక్కడా ! జనం కూడ వాళ్ళ పుట్టిన రొజులని పెద్దగా పట్టించుకోరు ! అసలు వారు హిస్టరీ పుస్తకాలలో తప్ప ఇంకెక్కడా మచ్చుక్కైనా కనపడరు

సింగ :- ఆపు నీ వెటకారం ! అలా అయితే మరి గాంధీ గారు అన్ని చోట్ల కనపడతారు , ఆయన మరి మహాత్ముడెలా అయ్యారు ?

లింగ :- నీకింకా అర్ధం కావట్లేదు ! గాంధీ గారు ఇప్పుడు మహాత్ముడో , లేక జాతిపిత గానో కంటే ఒక బ్రాండ్ నేముగా మిగిలిపోయారు .. పేరు చివర తగిలించుకుంటే వారసత్వం గా పదవులు వస్తున్నై , గోడకి తగిలించుకుంటే పవరొస్తోంది ... ఆఖరికి పెన్నులకి ఆయన పేరు పెట్టుకుని లక్షలకి అమ్ముకున్నారు .. అది బాబు నేటి రాజకీయం !

సింగ :- మరి స్కాములంటున్నావ్ , ఎం చేస్తావేంటి ?

లింగ :- అదేరా ఆలొచిస్తున్నా ! గడ్డి తో చెసేసారు, ఆటలతో చెసేసారు , ఆఖరికి కనిపించని తరంగాలతో కూడా కోట్లు దండుకున్నారు . నాకిక మిగిలింది ఎంటో ?

సింగ రాజు కోతలు - లింగ రాజు వాతలు

2010-09-19T22:28:00.000-07:00

పాత పాటలు వింటూంటే ఆ సంగీతంతో పాటు సాహిత్యం కూడా మనసుకి ఆహ్లాదంగాను , ఆనాటి పరిస్థితులకి ప్రతిబింబంగాను ఉంటాయి. కామెడీ పాటల్లో కూడా ఎంతో నీతి ఉండేది , అలాంటి పాటల్లో ఒకటైన పాట
"కాశీకి పోయాను రామా హరీ ,
గంగ తీర్థంబు తెచ్చాను రామా హరీ " అనేది.

రేలంగి గారు సన్యాసి వేషంలో వారికి నచినట్టు కోస్తూ ఉంటే , వారి గాలి తీసేసే పాట ఇది ..

అలాగే మన సింగ రాజు గారు కూడా ఒక సాయంకాలం పూట, గట్టు మీద చెట్టు కింద గుమిగూడిన "పిచ్చాపాటి" మేళం ముందు కోతలు కొయ్యడానికి పూనుకున్నారు ..
మన లింగ రాజు చుస్తూ ఊరుకుంటాడా? ఇలాంటి అవకాసం కోసమే ఎదురుచూస్తున్నాడాయె..

సింగ :- ఢిల్లీకి వెళ్ళాను రామా హరీ

           సోనియా గాంధీని కలిశాను రామా హరీ
            దేశ ప్రగతి చర్చించాను రామా హరీ...
(తందాన తందాన తందానతానా..)

లింగ :- ఢిల్లీకి పోలేదు రామా హరీ
           ఇంటి గడప దాటే లేదు రామా హరీ
           ముసుగు తన్ని పడుకున్నాడు రామా హరీ ..
(తందాన తందాన తందానతానా..)

ఆయ్ !! మాటకి మాట అన్నట్టు , పాటకి పాట అప్పచెప్తున్నాడనుకుని , ఒళ్ళుమండి , ఇలా మొదలెట్టాడు ..

సింగ :- అమెరికా వెళ్ళాను రామా హరీ

           ఆంధ్ర సంతతిని కలిశాను రామా హరీ
           ఆయిల్ లీకునాపొచ్చాను రామా హరీ...
(తందాన తందాన తందానతానా..)

లింగ :- బస్సు టిక్కట్టుకే రామా హరీ
           చెంత చిల్లిగవ్వా లేదు రామా హరీ
           ఇంక లోకసంచారమా రామా హరీ ..
(తందాన తందాన తందానతానా..)

సింగ :- ముఖ్యమంత్రీ పదవి రామా హరీ
            వద్దు వద్దు వదిలేశాను రామా హరీ
            ప్రజాసేవకంకితమైతి రామా హరీ...
(తందాన తందాన తందానతానా..)

లింగ :- పదవి కోరీ వెడితె రామా హరీ
           చాచి తన్ని తరిమేశారు రామా హరీ
           ప్రజాసేవ వట్టీ మాట రామా హరీ ..
(తందాన తందాన తందానతానా..)

సింగ :- నిజము చెబుతానండి రామా హరీ

           నేను దేశభక్తుడనండి రామా హరీ
           నన్ను పూర్తిగా నమ్మండి రామా హరీ...
(తందాన తందాన తందానతానా..)

లింగ :- రాజకీయము లెండి రామా హరీ
           ఓట్లపాట్లండి ఈ సంత రామా హరీ
           నమ్మి చెడుటేల ? జాగ్రత్త రామా హరీ ..
(తందాన తందాన తందానతానా..)

సింగ :- న్యాయమూ ధర్మమూ రామా హరీ

          నాకు అన్నపానీయాలు రామా హరీ
           ప్రజలు కన్నబిడ్డాలింక రామా హరీ...
(తందాన తందాన తందానతానా..)

లింగ :- మద్యమూ లంచమూ రామా హరీ
           పరమప్రీతిపాత్రములండి రామా హరీ
            ప్రజలబ్రతుకులేలెక్కింక? రామా హరీ ..
(తందాన తందాన తందానతానా..)

సింగ :- మా మతము చేరండి రామా హరీ

           చాల డబ్బులిస్తామండి రామా హరీ
           డాలర్లు రాశిపోస్తామండి రామా హరీ...
(తందాన తందాన తందానతానా..)

లింగ :- వెర్రిగొర్రెల రీతి రామా హరీ
           కసాయివార్ల నమ్మావద్దు రామా హరీ
           నేటి బానిసత్వమ్మిదే రామా హరీ ..
(తందాన తందాన తందానతానా..)

సింగ :- చేత కానీ వారు రామా హరీ

           మీ దేవతలు, రాళ్ళు , రామా హరీ
           పుచ్చు వంకాయ మీ భక్తి రామా హరీ...
(తందాన తందాన తందానతానా..)

లింగ :- సహనశీలురమేము రామా హరీ
          చేతకాక వదలాలేదు రామా హరీ
           తాటతీసివేస్తామింక రామా హరీ ..
(తందాన తందాన తందానతానా..)

ఇంత కోతలు కోసి , రాముడు , కృష్ణుడు , ఎవరూ లేరు , అదంతా ఛాదస్తమని ఎక్కడో ఎవడో పనికిమాలిన పనీపాటా లేనివాడు , ఇండియాని , ఇండియన్ దేవుళ్ళని , ఆ ఆచరాలనీ తిట్టడమే జీవనోపాధిగా ఉన్నవాడు రాసిన చెత్త చదివీ పాడైన బుర్రతో వాదించేశాడు సింగరాజు ..

కాని లింగరాజు & మిగతా జనం కోపం చూసి , సన్నగా వెన్నులో చిన్న ఒణుకు పుట్టేసరికి .. ఈ ఒక్కసారి తనని రక్షిస్తే .. గట్టుమీదున్న శివుడికి గోదారి నీళ్ళతో అభిషేకం చెయిస్తానంటూ మొక్కుకుని , మెల్లగా జారుకున్నాడు మన సింగరాజు ..

అంతా విష్ణు మాయ !!

చిరిగిన నోటు - సింగరాజు పాట్లు

2010-09-01T04:18:00.000-07:00

జగన్నాటక సూత్రధారి కంసవధ కోసం , కురుక్షేత్ర సంగ్రామంలో పార్ధసారధిగా పరమార్ధం బోధించటం కోసం , దేవకీ గర్భాన, కారగారంలో,రాక్షసులు తిరిగే నిశా సమయంలో , తనని తానే సృజించుకున్న శ్రీకృష్ణాష్టమి పర్వదినాన ..

తమ వీధిలో పెట్టిన ఉట్టి కొట్టొచిన ఆనందం లో లింగరాజు ఉంటే , మొహం వేలాడేసుకుని కూర్చున్నాడు సింగ రాజు ..

లింగ :- ఏరో ! ఎమైందేంటి , మొహం రాజమండ్రి బ్రిడ్జి గతుకులలో , డొక్కు ఆటో లో కుక్కుకుని వచ్చిన వాడిమల్లే పెట్టావ్ , ఏంది కథ ?

సింగ రాజు భారంగా నిట్టూర్చాడు ..

లింగ :- ఏంటి నిరాశే? అయితే నీకు రెండు ఇసుక రేణువుల కధ చెప్తా నిరాశ పోతుంది , పూర్వం బ్రహ్మా...

సింగ :- రే ! ఆపరా , అది నేనే నేకు చెప్పాను..

లింగ :- ఓహో! నువ్వు చెప్పిందేనా అది , మర్చిపొయా :-)

సింగ :- అయినా సందర్భం ఏంటో తెలియకుండా అన్నిటికీ ఆ కధే చెప్పేస్తావా ?

లింగ :- ఏమో , నువ్వు కూడా ఆత్మనూన్యతతో ఉన్నావేమో అని అనుకున్నా .. మరెందుకిలా ఉన్నావ్? ఆ కరణం గారి అమ్మాయి, నీ ప్రేమ తిరస్కరించిందా?

సింగ :- ఊహూ ..

లింగ :- మరైతే , వాళ్ళ నాన్నకి చెప్పేసిందా? చెప్పరా బాబు కొన్నాళ్ళు నీతో తిరగడం మానేస్తాను.. తిక్కచచ్చినోడు నన్ను పట్టుకుని వాయించేస్తాడు..

సింగ :- కాదెహై !

లింగ :- కొంప తీసి ఒప్పేసుకుందా ఏంటి , ఇంత బాధ పడుతున్నావ్..

సింగ :- అదేమి కాదు రా బాబు .. ఈ రోజు పొద్దున్నే ఎవరి మొహం చూసానో ఏంటో .. ఒక బొండం తాగి వందిస్తే , ఇచ్చిన చిల్లరలో ఒక పది నోటు చిరిగిపోయిందొచ్చింది ..

లింగ :- ఆరి పిసినారోడా ! ఒక్క చిరిగిన నోటుకి ఇంత నిరాశా ?ఎవడు మన బొండాంసత్తిగాడేనా ఇచ్చింది, వాడినే అడుగు ఇంకోటి ఇవ్వమని ..

సింగ :- వాడు కాదు , వీడెవడో కొత్తోడు ,ఆనక బాబాయి హోటల్లో టిఫిన్ తిని బిల్లు కడుతూంటే అప్పుడు గమనించా .. ఆ బొండాలోడి కోసం ఊరంతా తిరిగా , లాభం లేదు దొరకలేదు..

లింగ :- మరేం చెసావ్?

సింగ :- అది మారుద్దమని మన శెట్టి కొట్లో అవసరం లేకపొయినా , పప్పు , ఉప్పు కొనేసి , తెలివిగా , మిగతా నోట్లతో పాటూ ఇది కలిపేసి ఇచ్చేసాను .. కాని ఆ శెట్టిగాడు పట్టేసాడు ...

లింగ :- డబ్బువిషయంలో వాడంతేగా .. ఆ తర్వాతా?

సింగ :- ఇంకో రెండు మూడు కొట్లలో ఇలా అవసరం లేక పొయినా ఎదో ఒకటి కొని ఇది మారుద్దమనుకున్నా , కాని లాభం లేదు , ఎవ్వడూ తీస్కోలేదు ..

లింగ :- మరి ?

సింగ :- ఇంక ఉక్రోషం ఎక్కువైపోయి , ఎలాగోలా దాన్ని వదిలించుకోవాలని చెప్పి , మన బస్ స్టాండ్లో ఎవరు చుడకుండా పడేసా..

లింగ :- పొన్లే , ఒదిలిపోయిందిగా..

సింగ :- ఏంటి పోయేది , వెనకాలే ఎవడో పరిగెత్తుకుని వచ్చి మరీ "సార్ మీ నోటు పడిపొయింది సార్" అని ఇచ్చి వెళ్ళాడు .. బహుశా దొంగలకి కూడా ఆ చిరిగిన నోటు అక్కర్లేదేమో ..

లింగ :- ఒరినీ ఇదా నీ ప్రాబ్లం .. నోటుని గోదాట్లో వేసెయ్యి.. సరిపోతుందిగా ..

సింగ :- అదే అనుకున్నాను , కాని మన గోదారి గట్టున ఉన్న కృష్ణుడి గుడి గంట వినపడే సరికి ఒక ఐడియా వచ్చింది .. మెల్లగా వెళ్ళి , హుండీ లో వేసేసి ప్రసాదం కడుపునిండా తినొచ్చాను

లింగ :- బాగుంది రా .. మరేం , అది ఒదిలిపోయింది గా , ఇంకెందుకు ఈ దిగులు ..

సింగ :- అసలు గొడవ ఇక్కడే మొదలయింది

లింగ :- పశ్చాత్తాపమా ?

సింగ :- అంతలేద్రో ! అలా హుండీలో వేసొచ్చానో లేదో , ఇలా మన పోస్టుమాన్ వచ్చి , మా మవయ్య పంపిన పదివేల మనీ ఆర్డర్ ఇచ్చి పోయాడు .. పూర్వం , మా నాన్న దగ్గర అప్పు తీసుకున్నాడంట , ఇప్పుడది వడ్డీతో కలిపి పదివేలయ్యిందని , ఆలస్యమయినందుకు క్షమించమని రాసి పంపాడు..

లింగ :- వార్నీ ! మరేమనుకున్నవ్ కృష్ణుడంటే .. అటుకులిస్తేనే పొంగిపోయి ఐశ్వర్యమిచ్చాడంటే నమ్మలేదు నువ్వు .. ఇప్పుడు చూడు .. ఐనా సంతోషించకుండా , ఇంకా ఏడుపు మొహం ఏంటిరా?

సింగ :- చిరిగిన నోటేస్తేనే పదివేలిచ్చాడంతే .. మామూలు నోటు వేసి ఉంటే ఇంకెంత వచ్చి ఉండేదో అని .. ఛాన్స్ పొయిందే అని బాధ..

లింగ :- ఓరి నీ ఆశ !! కృష్ణ కృష్ణ !!

"కామన్"వెల్త్ -- లింగరాజు క్లాస్ పీకుడు..

2010-08-29T06:53:00.000-07:00

సింగ :- ఒరే , కొద్దిరోజుల్లో కామన్వెల్త్ గేములు మొదలవుతాయి గదా , వెల్దామేంటి?

లింగ :- ఎందుకురా?

సింగ :- ఎందుకంటావేంటిరా !! దేశదేశాల క్రీడాకారులొస్తారు , మన దేశ స్టార్స్ వస్తారు .. మన సైనా , అభినవ్ బింద్రా , ఇలా అందర్ని చుడొచ్చు గా ...

లింగ :- మనోళ్ళన్నావ్ ఒప్పుకుంటాను ... కాని మిగతా స్టార్స్ ఎవ్వరూ రావట్లేదు ..

సింగ :- అదేంటి ?

లింగ :- ఆట మధ్యలో ఏ పైకప్పో ఊడి పడిపోతే ? గట్టిగా వానొచ్చి ఆ వరదల్లో కొట్టుకుపోతే ? ఎవరి భయాలు వాళ్ళవి !!

సింగ :- నువ్వు మరీనురా ... ఏదో ఒకసారి జరిగితే అస్తమానూ జరుగుతుందా ఏంటి? పైగా మన దేశంలో జరిగేదానికి మనమే వెళ్ళకపోతే , పరాయి దేశాల వాళ్ళ ముందు మన పరువుమనమే తీసుకున్నట్టు ఉండదా ? అది మన బాధ్యత కాదా? మన కుటుంబంలో తప్పు జరిగితే , మనలో మనమే చూసుకోవాలి గాని .. ఇలా రచ్చకెక్కకూడదుగా ...

లింగ :- బాధ్యతా? ఏరా మొన్న జరిగిన ఎలెక్షన్లలో ఓటేసావా?

సింగ :- అంటే .. అర్జెంట్ పని వల్ల , బూత్ కెళ్ళ లేకపోయాను రా !!

లింగ :- మరి ఇంకేం బధ్యత రా .. ఓటెయ్యడానికి లేని బాధ్యత , ఆటలకి వెల్తే మటకూ నిలబడుతుందా? నీలాంటి వాళ్ళవల్లే , ఇప్పుడు దేశం పరువుపోతోంది ..

సింగ :- ఏంటి దేశం పరువు తీసేసానా ? నేనా? పిచిగాని ఎక్కిందేంటిరానీకు ? నా ఒక్క ఓటుకి దేశం పరువుకీ సంబంధం ఏంటి ..

లింగ :- అదే .. నువ్వు వెయ్యవు , నిన్ను చూసి నీ పక్కోడుకూడా నాకెందుకు అనుకుంటాడు .. ఇలా అందరూ అనుకోబట్టే , ఈనాడు చేతగాని వాళ్ళందరూ అందలం ఎక్కి, ఇస్టం వచినట్టు , స్కాములు చేసేసి దేశం పరువు తీసేస్తున్నరు.. 35,000 కోట్లు ఖర్చు పెట్టి , కూలిపోయే స్టేడియాలు,నాసిరకం వసతులు , ఇంకా పూర్తి గాని పనులూనా ? ఒక పక్క ఒలింపిక్స్ కి మన పక్క దేశం, చైనా , ఎంత బాగా జరిపింది ... ఆఖరికి "డార్క్" ఖండం ఆఫ్రికా కూడా మొన్న సాకర్ వరల్డ్ కప్ నువ్వా నేనా అన్నట్టు చేసింది .. నూరు కోట్ల జన సంపద ఉన్న మన భారతానికి ఎమిట్రా ఈ దౌర్భాగ్యం... ఇంత జరిగినా , స్కాములు చేసిన మంత్రులూ బాగనే ఉన్నారు .. వాళ్ళని నడిపే "అమ్మలు" కూడా బానే ఉన్నారు .. మన ఆత్మగౌరవమే , చేతగాని నాయకుల దయాదాక్షిణ్యాల మీద ఆధారపడి ఉంది ... ఢిల్లీ నగరం ఇప్పటికే ఒక్క వానొస్తే సముద్రమైపోతోంది , ముందు దాన్ని బాగుచెయ్యకుండా , గేములకొచ్చే వాళ్ళ "టిష్యూ పేపర్"లకి 4 కోట్లు , .. ఎమైనా అంటే గేములవ్వనివ్వండి , పరువు తియ్యకండి అనడమా? పరువు ఎవరు తీస్తున్నార్రా ?

సింగ :- ఆటలకి వెల్దామన్న ఒక్క మాటకి ఇంత క్లాసు పీకుతావా ... ఇది ఘోరం .. నేను ఖండిస్తున్నా ..

లింగ :- ఖండించటం కన్నా , నువ్వూ నేనూ , ఇంకేం చెయ్యగలంలేరా ..

సింగ :- ఒక్కటి చెయ్యగలమేమోరా !!

లింగ :- ఏంటది? సమ్మెలు చెయ్యడమా ? అవి వాళ్ళని ఏమీ చెయ్యవు , దున్నపోతు మీద వాన పడ్డట్టు , మన నోరునొప్పి తప్ప ..

సింగ :- కాదు !! వచ్చే ఎన్నికలలో తప్పకుండా ఒటెయ్యడం !!

లింగ :- చూద్దాం .. కాని వాళ్ళ లెక్కలు వాళ్ళకున్నాయ్ ..వారసులు అనే బ్రహ్మాస్త్రం ఉందిగా..దానికి తగ్గట్టు గా తగిన "కోచింగ్" కూడా నడుస్తోంది

సింగ :- అరెరే !! నిజమే కదా !!

ఒక కొత్త "ఇజం"

2010-08-20T04:30:00.000-07:00

సింగ :- ఒరే లింగం ! దేశం లో ఒక కొత్త "ఇజం" మొదలైంది తెలుసా ..

లింగ :- ఇంకో కొత్త "ఇజమా" , ఇప్పుడేం మొదలైంది ?

సింగ :- "కన్వర్షనిజం "

లింగ :- పేరు బాగుంది ! కాని ఏంటిది?

సింగ :- తెలీదా ! ఎప్పటినుంచో ఉన్నదే , మతమార్పిడులు .. ఒకప్పుడు , గుట్టుగా జరిగేవి .. ఇప్పుడు "పెద్దల" అందదండలతో మహ జోరుగా జరుగుతున్నాయిలే

లింగ :- అవున్రో విన్నాను ! అంతెందుకు మన దానయ్య లేడూ , వాడేరా కరణం గారి పాలేరు కొడుకు ,ఉద్యోగం అని పట్నానికి వెళ్ళి , "ధర్మపాదం" గా తిరిగొచ్చడు .. మతం మారినందుకు 10,000 ఇచ్చారంట , విదేశాలనుంచి దబ్బులొస్తాయంట , అన్ని సౌకర్యాలూ ఉంటాయంట .. వీడు చెయ్యల్సిన పనల్లా , వీడిలా అందరిని మతం మార్పించడం ...

సింగ :- ఇదే మరి నేటి కొత్త "ఇజం" ..

లింగ :- ఎప్పుడో మొదలైనవేగా ఈ మార్పిడులు .. ఇప్పుడు కొత్తగా చెప్తున్నావేం , పైగ "ఇజం" అంటున్నావ్ ..

సింగ :- ఎందుకంటే , ఇది నేడు దేశంలో బాగా విస్తరించిన ఒక "నెట్ వర్క్" కాబట్టి ... అన్ని రకాల అండదండలూ , ధనబలం , వార్తాసాధనాలద్వారా ప్రచారం పక్కాగా సమకూర్చబడుతున్న ఒక సంస్థ కాబట్టి.

లింగ :- అంటే ?

సింగ :- సరిగ్గా చూడు .. గత ఐదేళ్ళలో , హిందూ స్వాములపై , పీఠాల పై , ఆచార్యుల పై , ఎన్ని కేసులూ , ఎంత నిఘా , ఎంత కవరేజీ జరిగిందో .. ఆఖరికి పరమ పవిత్రమైన తిరుమలను కూడా వదలకుండా , ఈ "ఇజం" ఎంతలా వేళ్ళూనుకుపొయిందో ..

లింగ :- నువ్వు హిందువువని ఇలా అంటున్నావనుకోవచ్చుగా ..

సింగ :- నేను మాత్రమే కాదు , ఈ మార్పిడుల్లో సాయ పడుతోంది కూడా హిందువులేరా ... కాని పేద హిందువులు ... పూర్వం బ్రిటీషు సైన్యం లో సగం మంది భారతీయులే ఉన్నట్లు ... ఈ "ఇజం" లో కూడ సగం మంది కార్యకర్తలు పేద హిందువులే , వాళ్ళ పేదరికానికి డబ్బు ఎరగా వేసి ఆకర్షిస్తున్నారు ..

లింగ :- టెర్రరిష్టు సంస్థల్లా తయారయ్యారంటావు ..

సింగ :- మన దేశ సంస్కృతి లో భాగమైన పరమతసహనం అనే పదానికి వక్రభాష్యం లా తయారయ్యారు .. పొరుగుమత దైవాలని బండ బూతులు తిట్టడం .. బురద జల్లడం .. వారి ఆత్మగౌరవాన్ని కించ పరిచేలా ప్రవర్తించటం .. ఇదే వీళ్ళ దినచర్య ...

లింగ :- వీళ్ళకింత ధైర్యం , డబ్బూ , ఎక్కడనుంచొస్తున్నాయో ?

సింగ :- ఇంకా అర్ధం కాలేదా .. మనం ఇంకా బానిసత్వంలోనే ఉన్నామురా ... భారతదేశానికి అధ్యాత్మికత అనేది వెన్నెముక అని , దానికి పట్టుగా నిలిచే పక్కటెముకలు ఈ రకరకాల మతాలని కనిపెట్టి , "విభజించి పాలించు " సూత్రాన్ని పాటిస్తూ దేశానికి స్వాతంత్రం ఇస్తూనే , మత చిచ్చు పెట్టి పొయారు తెల్లోళ్ళు .. వాళ్ళ వారసులుగా , ఈ "ఇజం" పాటించే వాళ్ళు తయారయ్యరు ..

లింగ :- అంటే ఇదంతా చేయించేది బ్రిటీషు వాళ్ళే అంటావా?

సింగ :- మనం అద్దం లాంటి వాళ్ళమ్రా .. ఆ రాయే కాదు , ఏ రాయి తగిలినా పగిలిపోతాము , అలా దశాబ్దాలు గా పగుల్తూనే ఉన్నాం ..

లింగ :- మరి దీనికి అంతం లేదా?

సింగ :- ఇక్కడ ఒక విషయం మర్చిపోతున్నారు వారు .. ఒక అద్దం లో ఒకటే కనిపించే బింబం , అది పగల కొట్టగానే , వేల అద్దాలలో వేల బింబాలుగా ప్రతిఫలిస్తుంది .. ఒక బింబాన్ని నాశనం చెద్దామని వచ్చినవాళ్ళకి , వేల బింబాలు దర్శనమిస్తున్నాయి .. అందుకే , ఆ ఉక్రోషం లో చెస్తున్నవే ఈ తాటాకు మోతలు ..

లింగ :- సరైన మాటన్నావ్ ! జై హింద్ ..

సింగ :- జై హింద్

సింగ,లింగ రాజుల జుగల్బందీ

2010-08-18T05:22:00.000-07:00

ఒకానొక సాయంకాలపు ముచ్చట్లలో , మన సింగ రాజు & లింగ రాజు పక్కనే ఉన్న గోదారి అలలను చూసీ,మెల్లగా ఇక సెలవంటూ వెళ్ళిపోయే సందె సూరీణ్ణి చూసి కవితావేశం పెల్లుబికి , చిన్న కవితా జుగల్బందికి సిద్దమయ్యారు

సింగ :- ఒక నిర్వేదం
            కదిలి వచ్చే చీకట్లమాటుకు
            తరిలి పోయే నేస్తాన్ని చూస్తూ
            పొద్దుతిరుగుడు పూల ఎదలో
           అల్లుకునే విషాద నాదం

లింగ :- ఒక ఉత్సాహం
            విరహమింక చాలునంటూ
            వలచి వచ్చే వెన్నెలను చూసి
            కొలనులో కలువల బుగ్గల
            తళుకుమనే సిగ్గు ముత్యం

సింగ :- ఒక నిస్తేజం
           పగలంతా పనుల మునిగీ
           ఒడలుమొత్తం అలిసిపొయీ
          ఉసూరంటూ ఇల్లు చేరే
           సగటు జీవి ఆయాసపు నిశ్వాసం

లింగ :- ఒక ఆనందం
          వేచి ఉండే ఆలుబిడ్డల
          పంచచేరి కాలంగడిపగా
         పగటి కష్టం మరిచిపొయే
          అందరి ఉల్లాస సమయం

సింగ :- ఈ నిశీధి , ఒక నేటికి సమాధి

లింగ :- ఈ నిశీధి , ఒక రేపటికి నాంది

సింగ :- బ్రతుకైనా , బరువైనా ..
           నిజమైనా , నిష్టూరమైనా ...
           ప్రతి ఆరంభపు చివరి అంకం
          ప్రతి వెలుగూ చేరే శూన్యం
          ఈ చీకటి

లింగ :- అవమానాలే ఎదురైనా
           అలుపు లేక సాగమంటూ
          మలుపు దాటితే ఉషొదయమే
          స్వాగతించునని చాటి చెప్పే
          ఆదర్శమే ఈ చీకటి..

సింగ :- ఇంక చాలు లేరా , ఇంటికి పోదాం , ఆకలి వేస్తోంది

లింగ :- అవున్రా ! కడుపులో అన్ని రకాల జంతువులూ ,ఉస్సైన్ బోల్ట్ కన్నా స్పీడ్ గా పరిగెట్టేస్తున్నాయి

అంటూ ఇంటి ముఖం పట్టారు ... ఎంతటి భావోద్వేగమైనా , ఆకలిని మించినది కాదు కదా !!

సింగ రాజు సంగీతం-లింగ రాజు సాహిత్యం

2010-08-16T03:47:00.000-07:00

ఒక అపరాహ్నవేళ ...

సుష్టుగా భోజనం చేసి ... నోటి నిండా కిళ్ళీ వేసుకుని.. ఏ లోకోత్తరమైన విషయం మీద చర్చిద్దామా అని మన రాజులిద్దరూ సమాలోచనలు జరుపుతున్న సమయం...

దూరంగా , ఆకాశవాణి లో "గోదారి గట్టుందీ ..." అనే పాత పాట వినపడుతూంటే , ఆ సంగీతానికీ ఆ సాహిత్యానికీ పరవశులయ్యి .. నములుతున్న కిళ్ళీలు ఐపొతే , తాపీగా చుట్ట వెలిగించుకుని , ఆకాశం కేసి చుస్తూ..

సింగ :- ఆహా ! ఎంత మంచి సంగీతం రా లింగా ! మనసులోంచి వచినట్టుందిగా ..

లింగ :- మరే ! ఆ సాహిత్యం చూడు , మనసుకి హత్తుకునేలా లేదు..

సింగ :- అవున్రా లింగం ! ఎంతైనా సంగీతానికి సాహిత్యానికి ఉన్న శక్తి మరేదానికీ లేదంటాను .. ఏమంటావ్?

లింగ :- రైటైన మాటన్నావ్రా సింగా ! మనసు తేలిపొతుందనుకొ ... అవును నీకు సంగీతం అంతే ప్రాణం అనుకుంటా , ఏవో రెండు మూడు నాటకాలలో హార్మోనియం కూడా వాయించినట్టున్నావ్ ?

సింగ :- మరే ! నీకు కూడ సాహిత్యమంటే ఇష్టం అనుకుంటా ?

లింగ :- కరష్ట్ !

సింగ :- ఐతే , నేనొక రాగం వదులుతాను , ఆశువుగా పాటనల్లగలవా?

లింగ :- నేను రెడీ ! నువ్వు నా సాహిత్యానికి తగ్గ స్వరాలు అందించగలవా ?

సింగ :- అబ్బో , సరే ఐతే కాసుకో ... జై కె .వి. మహదేవన్ గారు ..

లింగ :- జై సిరివెన్నెల సీతారామశాస్త్రి గారు...

సింగ :- "తన తాన నాన .. తన తాన నాన ..తానాన నాన తాన తాన తందానా .."

లింగ :- "తన తాన నాన .." ఇదెక్కడో విన్నట్టుందే ... ఆ .. "కన్నె పిల్లవని కన్నులున్నవని , ఎన్నెన్ని కలలు కంటున్నావే చిన్నారీ " ... ఈ పాట కదూ , దొంగ నా "___" ... కాపీ కొట్టి నీ సంగీతం అని చెప్పేసుకుంటావా?

సింగ :- ఏం మన మ్యూజిక్ డైరెక్టర్లు ఇదే పని చేస్తే , సూపర్ అంటావా? నేను చెస్తే తిడతావా? పాట కట్టలేను అని చెప్పరా , ఈ కబుర్లన్నీ ఎందుకూ ?

లింగ :- అంత మాటంటావా ? చూడరా తెలుగు పారడీ పవర్ చూపిస్తాను...

"కన్నె పిల్లవని కన్నులున్నవని ఎన్నెన్ని కలలు కంటున్నావే చిన్నారీ "

" పల్లవి :- పీఠమున్నదని , అడ్డు లేదు అని , ఎన్నెన్ని స్కాములు చెసేస్తావు ఓ మంత్రీ ...

             నోటు పుచ్చుకుని , నిన్ను ఎన్నుకుని , తప్పు చేసిందిక మేమేలేవో మా మంత్ర్రీ ...

              దుర్మాగం నీదైతే ...

               దౌర్భాగ్యం మాదంటా ... "                     ||పీఠ||

"కవిని నేనై ... నాలో కవిత నువ్వై ..."

చరణం :- బలుపు నీదై .. నీ బలి పశువు మేమై ...

             కంచే.. చేనుని.. మేస్తే

              ఓటు మేమై ... మా వెన్నుపోటు నువ్వై ...

              నీ దురాశకే ...పుడమే.. జడిసీ ...పోయే ... "

సింగ :- భలే భలే ! బాగా రాశావ్ ....

లింగ :- మరేమనుకున్నావ్ .. సంగీతం కాపీ కొట్టినా , సాహిత్యం లో మనకు మనమే సాటి ... ఒక్క వేటూరి పాట చాలు , తెలుగు సాహిత్యం తియ్యదనం రుచి చూడటానికి..

సింగ :- బాగుంది ... ఇలాంటి మెలొడీలేనా , లేక ఫాష్ట్ పాటలకి కూడా పారడీలు కడతావా ?

లింగ :- దేనికి కట్టమంటావ్ ?

సింగ :- నాగర్జున , "రక్షకుడు" సినిమా లొ నా ఫావరైట్ ..

       " సోనియా సోనియా ...స్వీటు స్వీటు సోనియా ..

            రేగుతోందె లేత వయసు జోరూ ...

            ఘాటు లవ్వు రెండు టైప్సు .. నీటుదొకటి నాటుదొకటి

            రెండిట్లో ఏది నీకు ప్యారూ .."

లింగ :- ఓహో ! కొంచెం కష్టమే ...

సింగ:- ఐతే ఓడిపొయావా?

లింగ :- కష్టమన్నా గాని , చెయ్యనన్నానా? ఊ .. హూ... ..................ఆ.. కాస్కో ..

               " సోనియా సోనియా ...సీటు సీటు సోనియా ..

                ఇవ్వవమ్మ కాసులిచ్చు సీటు ..

                కామన్వెల్త్ గేములైన .. ఖనిజ గనుల స్కాములైన..

              మాకు అవే వేల వేల కోట్లూ .. "

సింగ:- శెభాష్ !!

లింగ :- థాంక్యూ !!

లింగ రాజు బెంగ పడితే...

2010-08-10T04:22:00.000-07:00

"కందువగు హీనాధికములిందు లేవు,
అందరికి శ్రీహరే అంతరాత్మ..
ఇందులో జంతు కులమంతానొకటే
అందరికి శ్రీహరే అంతరాత్మ.."

దూరంగా అన్నమాచార్య కీర్తన వినిపిస్తూంటే , మన సింగ రాజు సైకిల్ మీద ఈలేసుకుంటూ గోదారి గట్టున ఉన్న చింతచెట్టు దగ్గరకి వెళ్తున్నాడు .

అప్పటికే మన లింగ రాజు అక్కడకొచ్చేసి ఎప్పటిలానే ఏదో ఆలోచించటం మొదలు పెట్టేసాడు ..

సింగ :- ఎమ్రో ! అప్పుడే ఏదో ఆలోచించేస్తున్నావ్ ! మన శెట్టి గారి అప్పు ఎలా ఎగ్గొట్టాలనా?

లింగ :- ఏడిసావు లే గాని , నా మనసేమి బాగోలేదు ఈ రోజు నన్నేమి మాట్లాడించకు ..

సింగ :- ఎమైందిరా , ఎవరేమన్నారు?

లింగ :- ఎవరో ఎదో అన్నారని కాదు , ఎం , నాకు మనుసుండదా , నాకు బాధ రాకూడదా ?

సింగ :- ఒరే ఒరే ! ఆగు , ఇంత బాధ పడుతున్నావంటే ఎదో జరిగింది .. ఎమైంది..

లింగ :- ఛీ , ప్రశాంతంగా బాధ కూడ పడనివ్వరు కదా .. సరే విను ... ఈ రోజు నా మావయ్య కొడుకు పట్నం నుంది వచ్చాడు , ఎంత డాబు , ఎంత దర్పం అనుకున్నావ్ .. వాడి ముందు నా వాలకం చూసి అందరూ నవ్వారు తెలుసా , మనం కూడా పట్నం లొ చదివి ఉంటే ఇంకా గొప్ప గా ఉండే వాళ్ళం ఎమో .. చాలా చిన్నతనం అనిపించింది , అందుకే ఇక్కడకి ఇంత త్వరగా వచ్చేశాను ...

సింగ :- ఓరినీ ... ఇదా సంగతి ..

లింగ :- నీకు చెప్పుకున్నానని అలుసైపొయానా? , ఇది నీ దాకా వస్తే తెలుస్తుంది , ఎంత పెద్ద సంగతో...

సింగ :- అలా అని కాదురా లింగం , సరే , కొన్నేళ్ళ క్రితం మన ఊరొచ్చిన ఓ స్వాములోరు చెప్పిన కధ చెప్తాను విను

లింగ :- ఎవరూ ఆ పెద్ద స్వాములోరా?

సింగ :- ముందు కధ వినెహై ... పూర్వం సృష్టి చేస్తున్న చతుర్ముఖుడి దగ్గరకి..

లింగ :- తెలుగు లో చెప్పెహై ..

సింగ :- ఖర్మ ! బ్రహ్మ దేవుడి దగ్గరకి రెండు ఇసుక రేణువులొచ్చి .. "అయ్యా , మాకు కూడా ప్రపంచం లో పెద్ద స్థానం ఇవ్వండి ప్రభూ " అని కోరుకున్నాయి ..

లింగ :- ఇసుక రేనువులు , పెద్ద స్థానమా? కామెడీ !!

సింగ :- లింగం .. కధ విను ..

లింగ :- చెప్పు చెప్పు

సింగ :- ఆ పెద్దాయన అప్పుడు , " సరే" అని , రెండిటిని మన భూమ్మీద పడేసి , సరిపడంత నీరు , మట్టి , గాలి ఇచ్చి , "మీ ఇష్టం వచినట్టు ఎదగండి " అనేసి వెళ్ళి పొయాడు .. అలా కొన్ని వందల ఏళ్ళు ఐపొయాయి..

వాటిలో ఒక ఇసుక కణం , ఎన్ని కష్టాలొచ్చీనా తట్టుకుని , తనకిచ్చిన గాలి తో ఇంకొన్ని ఇసుక కణాలు పొగేసుకుని , ఆ మట్టి , నీరు అన్నిటి తో కలుపుకుంటూ , నెమ్మదిగా , పెద్దగా , ఎదిగి ఒక పర్వతమైపొయింది ...

లింగ :- నీరు ,మట్టి కలపడం ఏంటి , పర్వతమవ్వడమేంటి ... నాకర్ధం కాలేదు , ఎదొ లాజిక్ లేనట్టుందే..

సింగ :- అంత లాజిక్ తో చెప్పడానికి , నెనేమన్నా సైన్సు పాఠం చెబుతున్నానా ? యక్ష ప్రశ్నలాపి కధ విను ..

లింగ :- ఎం ప్రశ్నలు ?

సింగ :- కధ విను బే !
లింగ :- ఓ.కె

సింగ :- ఎక్కడున్నాం ? ఆ , అది అలా పర్వతమవ్వగా , రెండో ఇసుక రేణువు , ఆ పెద్దాయన ఇలా వెళ్ళగానే మహా హుషారుగా , పని మొదలు పెట్టింది ... కొన్నాళ్ళు బానే నడిచింది .. ఈ లోగా చిన్న తుఫాను రావటం అప్పటిదాకా పేర్చుకున్న కుప్ప కాస్తా ఎగిరిపోవటం , మళ్ళ్ళీ మొదలు పెట్టడం , ఇలా కొన్ని సార్లు జరిగేసరికి , నీరసించిపొయి , ఇంక మనవల్లేం అవుతుంది లే , అని పక్కనే పర్వతంగా ఎదుగుతున్న ఇసుక రేణువుని చూస్తూ , తన అదృష్టాన్ని తిట్టుకుంటూ .. ఇసుక రేణువు గానే మిగిలిపోయింది ..

లింగ :- అంటే , నెను ఆ రెండో ఇసుక రేణువునంటావ్ ?

సింగ :- నువ్వే కాదు రా , మనం మన స్వశక్తిని నమ్మనంత కాలం అందరం ఆ రెండో ఇసుక రేనువు లాంటి వాళ్ళమే

లింగ :- బాగుంది రా , సమయానికి నా శక్తి గురించి గుర్తు చేసి , నన్ను డిప్రెస్ అవ్వకుండ కాపాడావు.. ఇంత మంచి కధ ని ఆ పెద్దస్వాములోరే చెప్పారా? అప్పుడెం మాట్లాడినట్టు గుర్తులేదే ..

సింగ :- లేదు

లింగ :- మరెవరు చెప్పర్రా?

సింగ :- మనమే !!!

లింగ :- వార్నీ....

బాతాఖానీ--సింగ రాజు & లింగ రాజు

2010-08-07T09:11:00.000-07:00

సింగ రాజు & లింగ రాజు ఇద్దరూ ప్రాణ స్నేహితులు .
నిక్కర్లేసుకునే కాలం నుంచి ఇప్పటి దాకా మనస్పర్ధలే రాలేదు వీరి మధ్య ( ఎందుకంటే 80 % ఒకడు చెప్పేది ఇంకోడికి అర్ధం కాదు కాబట్టి !!).

షొలే సినిమా చూసి అమితాబ్ & ధర్మేంద్ర లా ఊహించేసుకుని గబ్బర్ సింగ్ కోసం తూర్పు & పశ్చిమ గోదారి జిల్లాల్ని సైకిళ్ళేసుకుని చుట్టొచ్చి , ఎవరూ దొరక్క తమ ధాటికి పారిపొయాడనుకునే వీరి వాలకం చుస్తే , పరమనందయ్య శిష్యుల్లో ఇద్దరు మళ్ళీ పుట్టారేమో అనుకుంటరెవ్వరైనా.

ఆలాగని వీరి మాటలను మరీ తీసి పారెయ్యలేం , వీళ్ళకి తెలియకుండానే కొన్ని నిజాలు కుండ బద్దలు కొట్టెసేలా చెఫ్ఫేస్తారు .. ఇలా ఎన్ని కుండలు బద్దలయ్యాయో ఉభయగొదావరి జిల్లల్లో లెక్కే లేదు.
వాళ్ళ "ఇంటెలెక్చువల్ డిస్కషన్" ని ఇలా బ్లాగ్ లొ పెడతానని నేను వాళ్ళని అడగటానికి వాళ్ళ ఊరు వెళ్ళా ... అదే మన కధ కి మొదలు ....

నేను :- నమస్తే సింగ రాజు గారు , నమస్తే లింగ రాజు గారు ..

సింగ :- "నమస్తే"
(లింగ రాజు గారు తనని కానట్టు ఏదో దీర్ఘాలొచన లో మునిగి ఉన్నారు)

సింగ :- ఒరేయ్ లింగం , నమస్కారం చెయ్యరా , నమస్కారనికి ప్రతి నమస్కారం , సంస్కారం .

లింగ :- "ఇదిగో నమస్కారం తీసుకొవయ్యా" అని నాకొక దండం పెట్టి, సింగ రాజు గారికేసి తిరిగి అదికాద్రా సింగా , అసలు సంస్కారం అంటే ఏంట్రా ?

సింగ :- నలుగురిలో ఒక పద్దతి గా నడుచుకోవటం.

లింగ :- అంటే?

సింగ :- అంటే, పెద్ద వాళ్ళని గౌరవించటం , తిట్లూ బూతులూ అందరి ముందూ మాట్లాడక పోవటం ఇలాగన్నమాట ...

లింగ :- ఒహో ! అయితే మన ఊరి MLA కి లేనిదే ఈ సంస్కారమన్నమాట !!

సింగ :- అదేంట్రా?

లింగ :- అసెంబ్లీ లో మాట్లడటం వినలేదా, నోరు తెరిస్తే కంపే కంపు ... ఏ స్కూల్లో చదివాడో తెలుసుకుని ఆ స్కూలుకి పంపించను నా పిల్లల్ని ..

సింగ :- పిల్లలా? పెళ్ళే కాలేదు కద రా నీకు

లింగ :- అమ్మాయి దొరకాలి కదా..

సింగ :- నీ మొహం !! నా మాట విని తొందరగా చెసుకో , లేకపొతే భవిష్యత్తు లో అవ్వదు

లింగ :- ఏ ? డిసెంబరు 2012 కి పోతామనా?

సింగ :- నీ మొహం

లింగ :- ఆ మధ్య వచ్చిన సినిమా  లో ఇదే చూపించారు గా

సింగ :- అదేమి కాదు , ఆడ పిల్లల సంఖ్య తగ్గిపొతోంది, తెలియదా?

లింగ :- ఇదేం గొడవ రా బాబు .. వీళ్ళు కూడా అంతరించిపోతారంటవా? ఏంటో ఈ కష్టాలు... మరి నాయకులు , పెద్దవాళ్ళు , మేధావులు ఎం చేస్తున్నార్రా?

సింగ :- వాళ్ళేం చెస్తారెహై ! వాళ్ళకి పెళ్లిళైపోయుంటాయి

లింగ :- ఔన్రా సింగా !! ఇదేదో ఆలోచించాల్సిన విషయమే..అవున్రా మరి అతిథులొచ్చినప్పుడు , వారిని అవమానించి పంపడం కుడా సంస్కారమేనా ?

సింగ :- అది సంస్కారేమేంటి? పొగరు .. ఇప్పుడు ఎవరు ఎవర్ని అవమానించార్రా ..

లింగ :- నువ్వు కూడ మన విదేశాంగ మంత్రి లా మాత్లడుతున్నావే..

సింగ :- వాడెవడెహై ..

లింగ :- ఫారిన్ మినిస్టర్రా బాబు ...

సింగ :- అది అలా చెప్పు ..

లింగ :- ఖర్మ ! సరేలే , ఈ మధ్య మన పక్కదేశానికి మాట్లాడటానికి వెళ్ళినప్పుడు , నలుగురు ముందు ఎలా  మాట్లడారో చుసావు గా ..

సింగ :- మన వాడేం వెలగ పెట్టాడో !

లింగ :- అవన్నీ పక్కన మాట్లాడుకొవాలి గాని , మాటలకి అని పిలిచి ఇలా చెయకూడదు కద రా ..

సింగ :- అయినా , ఆ మంత్రి కి లేని బాధ నీకెందుకు రా , మన మన్మోహన్ సింగ్ అన్నా తర్వాత మాట్లడాడు కాని ,ఈ మంత్రి కిమ్మనలేదు చూసావా ..

లింగ :- ఏం చెస్తాము రా , పిల్లనిచ్చాక ఇవన్ని తప్పుతాయా !!

సింగ :- పిల్లనిచ్చామా? ఎవరు ?

లింగ :- ఎంటెహై తెలియనట్లు మాట్లడతావు , మొన్నే గా మన సానియా ని వాళ్ళబ్బాయి కి ఇచ్చి చేశాం

సింగ :- ఓహో అలా వచ్చవా !!

అని అప్పటికి నెనున్నాను అనే విషయం గ్రహించి , ఏం కావాలి అన్నట్టు చూశారిద్దరూ..

"నమస్తే !! నేను మీ సాయం కోసం వచ్చాను ..ఏం లేదండీ మీరు ఒప్పుకుంటే మీ కబుర్లను నా బ్లాగ్ లో పెడతాను" అని నా మాట విని.. చిద్విలాసంగా నవ్వుతూ ఒప్పుకున్నారు            -- courtesy సింగ రాజు & లింగ రాజు